خرجت هالة صدقي عن صمتها، ونشرت فيديو عبر حسابها الرسمي، ردّت من خلاله على الجدل الذي أُثير حولها في الأيام الماضية، والهجوم الذي طالها على بعض المنصات، مؤكدة أنها لم تكن ترغب في الحديث الآن، لكنها اضطرت لذلك بسبب ما وصفته بـ"الحملة المدفوعة ضدها".
وقالت هالة في بداية الفيديو:"أنا كنت وعدتكم إني هطلع أتكلم، الحقيقي إنّي مكنتش حابة أتكلم دلوقتي، بس اضطريت. بشكر كل اللي قال عني كلمة حلوة ودافع عني، وبشفق على الناس اللي بيدفع لهم جامد جدًا ونفوسهم ضعيفة جدًا. بس أنا عذراهم، إحنا عندنا في البلد مشاكل كتير، في بلاد بتنهار، فمِن قمة التفاهة إن ناس تطلع تقول أصل دي ماكنتش موجودة".
وأضافت ساخرًة:"أنا طالعة النهاردة، بس عايزين شوية عنب وبطيخ كده، إحنا في الصيف، فدول فاضين وطالعين يسلوكوا! أنا بطلع أسليكوا في مسلسلاتي، دول بقى عندهم مرض اسمه عايزين يشتهروا، فبيتكلموا على حد مشهور، أنا برا مصر بقالي كام يوم، والنت في أماكن مفيهاش تغطية، وفوجئت بحملة معمولة عليا. الست دي – اسمها كله شر شر شر – اسم على مسمّى، والمأجرينها هما خمسة، سلاحف النينجا، بيكتبوا إن في فنانة مسنّة والمقصود أنا!".
وواصلت انتقاداتها اللاذعة:"هي بتقول عليا في السبعينات، طب أنا ممكن أبقى في التسعينات، بس روحي أنضف من عيل صغير، ولما تقولي أنا في الستينات، ده شغل ستات تافهة. بتقولي تافهة؟ أنا عارفة ست بتسمي نفسها رسامة، عملت حاجة في ميدان في جدة، ومسؤول عدى قال: إيه الزبالة دي؟ وشالوها!"
وختمت هجومها بالقول:"الجمهور بيقول عليا ملكة، وأنا ما بقولش على نفسي كده، لكن الست دي بتسمي نفسها الإمبراطور، وهي اللي ضيعت مستقبل راجل مهم جدًا في الدولة."
وفي تعليقها على الفيديو، وجهت هالة صدقي رسالة للإعلاميين الشباب، قائلة:"بشكر كل من دافع عني في غيبتي، وبعتذر إني بتكلم في موضوع تافه، لكن للأسف مضطرة علشان شبابنا اللي لسه على أول الطريق، ولازم ياخدوا بالهم قبل نشر أي خبر، عشان ميتورطوش في مسائل قانونية. المهنة دي محتاجة صدق وأمانة واحترام، وسمعتك أهم من أي إغراءات، لأنها مش هترجع تاني."
شاهد تقرير سابق: ما علاقة هالة صدقي بقضية عمر زهران؟
