يبدو أن تصريحات أحمد السقا في برنامج "السيرة" مع وفاء الكيلاني يوم الجمعة الماضي عن زعله من تامر حسني لاستخدام صورته على بوستر فيلم "الفلوس" دفعت تامر حسني ليرد على السقا من خلال ستوري على الانستغرام ويوضح فيه القصة الكاملة.
فشارك تامر: "حبيبي وأخويا وصديق العمر ونجم الدنيا كلها أحمد السقا، كنت أتمنى إنك تكلمني بيني وبينك لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك وأنا كنت أتمنى مكتبش الكلام ده هنا بس عشان بعد كلامك في التلفزيون الجمهور الكريم بقى ليه حق إنه يفهم الصح عشان أفكرك بس، إنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم.. وأنا رديت عليك إن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة لا يمكن تعمل كدا، لأن الفيلم متباع للخارج والداخل باسم أخوك تامر حسني، وأصلًا أفيش الفيلم الرسمي نزل والناس كلها شافته وإنت مش فيه ولا فيه اسمك وكل الأبطال طالعين مرسومين، معرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة وأنا شرحتلك دا من سنة واتكلمنا بعدها مرتين، مرة عيدت عليك في عيد ميلادك والتانية بخصوص برنامجك لو كنت لسه زعلان كنت هتقولي ساعتها، الفيلم بقاله سنة يا أحمد، أخيرًا بقى مستحيل الشركة تروج أو أنا أفوت أو أسمح باستخدام اسمك كبطل للفيلم وإنت مش فيه، لإن دا هيعود علينا كلنا بالضرر لإن الناس هتدخل الفيلم مش هيلاقوا الكلام دا فيبقى إحنا كدا بنضحك على الناس وضرينا الفيلم ولأن أكيد يشرفني إن إحنا نمثل مع بعض بطولة مشتركة لأنك حبيبي بجد ونجم أنا بحبه من قلبي فعلًا وبعدين يا حاج أحمد لما أنا جيتلك مسلسلك حصل اجتهادات كتير من محبينك الكرام شويه يقولوا المسلسل بطولتنا وشويه يقولوا لا دا ضيف شرف بس وإنت عارف إن عمري ما عملتها وطلعت ضيف شرف غير ليك، دا أنت طلبتني أجي أصور الساعة 8 الصبح كنت عندك في نص ساعة عشان فكرة طلعت في دماغك فجأة وجيت لإنك غالي عندي أوي أوي فوق ما تتصور، وكنت بفرح باحتهادات محبيك ومحبيني حتى لو صورتي صغيرة أو كاتبين بطولة أو ضيف شرف كل دا مش فارق لإني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا، إنت حبيبي يا أحمد وصديق عمر عشان كدا أنا مش هزعل منك معلش طولت في الكلام لإن برضو زعلك يعزّ عليا".
ليقرر أحمد السقا الرد من جديد وتوضيح موقفه من خلال بوست على فيسبوك كتب فيه "رسالة إلى صديق عزيز ......صديقى وأخي العزيز تامر حسنى... انت عارف اللّي بينى وبينك عيش وملح وحاجات كتير... قد أكون أخطأت أنني اتكلمت في الموضوع عالهوا ولكن يعلم الله كم كنت مجروحاً وكم كنت حزيناً.. مش هاطول عليك أكتر من كده ولو أنا زعلت شوية وإنت شوية نبقى خالصين يا عم...تامر حسنى احنا اللى بينا كتير ماتزعلش يا عم وحقك عليه...وميعادنا الحفلة اللّى جايه....أحمد السقا".
