خلال الفترة الماضية اشتعلت حرب كلامية بين زياد برجي، وإليسا، وأحمد ماضي، بعد طرح أغنية "أنا وبس" رسميًا على قناة إليسا عبر اليوتيوب، وهي من كلمات ماضي وتلحين زياد، ونشر ET بالعربي تصريحات وردود جميع أطراف الجدل.
وحصريًا في لقاء خاص معنا حسم زياد برجي جدل تسريب الأغنية بصوته بعد نجاحها بصوت إليسا قائلًا: "الأغنية كلمات أحمد ماضي، توزيع طارق توكل، وألحاني، وهي بتجنن الناس حبينها كتير، وهي كانت لي وبعطي ألحان لتنجح وفرحان كتير بنجاح الأغنية".
رد زياد برجي على تسريب أغنية "أنا وبس" بصوته
وعن تسريب مقطع منها بصوت زياد برجي علق قائلًا: "عملت تيزر لـ إليسا وفرحت بيه، بأول 10 أيام وهيدا بيصير بين أي ملحن وفنان، أصلا نحن بننزل أي أغنية بنلاقي الناس عاملينها كافر وبيغنوها، فكيف إذا أعلن الملحن إنه بعد 10 أيام حابب ينزل هالأغنية؟ ويصورها وهو أصلا هالأغنية كان بده ينزلها من قبل ومجهزها لتكون بالإصدار، ولما عجبت إليسا أعطاها الأغنية من كل قلبه بإتفاق خاص شفهي أمام الله بيني وبينها".
وتابع: "كنت ناوي أنزل هالأغنية بصوتي، لإن إليسا بتعرف إنها كانت معمولة لزوجتي ولعيد زواجنا، وكنت ناوي أنزلها بعد 6 شهور، وبما إن الشئ اللي صار بيني وبينها ورح يبقي هيك أمام الله، قررت أنزل الأغنية بعيد زواجنا 11 سبتمبر".
هدية زياد برجي لزوجته بعيد زواجهم
وأضاف: "في فنان عنده عقل براسه عم يشتغل على أغنية وقرر يقدمها وصار عليها كل هيدي البلبلة والحديث وراح اشتغل عليها بشكل محترف، ومش عاطيها لحدا وعم يصورها مع نادين الراسي ومكلفها إنتاج عالي لأنه بيعتبرها الوردة اللي كان راح يقدمها لزوجته من سنة بعيد زواجهم، غلط وما قدملها ياها، وحب يرجع يقدملها ياها ضمن كل الشروط اللي بتفرضها الأعراف والقوانين، القوانين مساحتها اسهل من هيك، الأعراف بتخليك تنتظر بس حتى الفنان يفرح بأغنيته، وأنا لما أغني كل أغانيي كل الفنانين بيفرحوا، ليش هيدي الأغنية مزعوجين منها هالقد إليسا والفانز تبعها ؟".
إنذار إليسا لـ زياد برجي بعدم الغناء لأغنية "أنا وبس"
واستكمل زياد حديثه عن أغنية أنا وبس قائلًا: "جاني إنذار غير مسبوق من إليسا نهار الجمعة بيقول إنه عم تمنعني أغني الأغنية كملحن، إنذار ما رح أقدر أجاوب عليه بنحكي فيه بعدين، بس بيهمني يوصل جزء من الحكاية للناس من مصداقية ET بالعربي".
وأشار زياد مُعلقًا: "فيك تسأل غسان رئيس شركة وتري، شو عملنا لنحد من انتشار الأغنية والتعدي على الحقوق، واشتغلنا مع مكتب مكافحة الجرائم الإلكترونية اللي بيساعدونا، وتقدمنا بشكوى لمعرفة من قام بتسريب الأغنية، وهلق عم نتحرى عن كل شكل سب عيلتنا أو بهدلنا أو هددنا بالقتل، هيدا مش مزح! وأنا لا أدعي إنهم فانز إليسا لهيك تقدمت بشكوى ضد مجهول، لكن في حال طلعوا طابور خامس يسئون لسمعة إليسا برأيك مو المفروض تتبرأ منهم وتعملهم بلوك وما تتشرف إنه يكون هيك فانز لها".
علاقة زياد برجي مع الفانز ويوجه سؤال لـ إليسا
وتابع: "أنا طلعت على تويتر قلت كلمة واحدة وطلبت من الفانز تبعي نكون محترمين، ونضل ولاد بيوت وخبرتهم إن اللي بيفتح فمه بعمله بلوك، نحن بنحترم وبنحمي حقوق المرأة طيب واللي بيتعدى على حقوق طفلة قاصر ما بتتعدى السبع سنين، أنا برضى بهيك فانز؟ سؤالي عم وجهه لـ إليسا ولكل فنان عبر ET بالعربي؟ لأول مرة بوصل لهذا الحد من المكالمات وتوصل للتهديد بالقتل! وبيتصلوا فيي على رقم بنتي اللي عمرها سبع سنوات وهيدا الرقم مع قلة قليلة من الأصدقاء وحذرت كل صحابي حتى ما يرسلوا ستيكر في شيء سيء لأنه بيكون دايماً بإيد بنتي، على هيدا التليفون لما بيجيني شيء من هذا النوع، الموضوع لو بقعد كل حياتي بشتريلهم بيت ينستروا فيه، رح أضل كل حياتي أشتغل لألقط هيدا اللي دق على رقم بنتي".
زياد برجي يتحدى إليسا ويقطع علاقته بها عبر الهاتف
وبصفته أب وجه رسالة لكل متابعي ET: "اللي بيسمح لنفسه يقول لأب ما يعمل هيك يخبرني من خلالكم! أثمرت المحبة لأني أقدم أغنية زوجتي، اللي مقدملها ياها بعيد زواجنا محل العرس اللي ما عملناه لأنه ظروفنا ما كانت بتسمح، أثمرت المحبة من طرفي عن كل مستوى العطاء، وكنت عم حاول أصلح بين الطرفين اللي كان بينهم محاكم، ولما اكتشفت إنه ما راح تظبط لغيت الاتفاق، وهيدا الشئ لازم الناس يعرفوه، شو انحكى وشو صار، عبر ET بالعربي بتحداها تطلع تقول شو صار، أنا حليت أموري معك يا إليسا على التليفون مثل أي صديق عاتب صديقه بالهاتف وقطع علاقته فه، يمكن كون قلتلها أنا بحبك كتير ما فيني أعيش بلاكي! ما بقى بدي احكيكي! شو عرفها العالم إن النهاية كانت سلبية؟ كيف عرفوا العالم شو حكينا؟ وصل يمكن من ورا نوع التويتة اللي نزلتها إنه حدا بيقطع بالواتساب، وإذا هيدا اللي حكيته بالواتساب والناس بتعرفه حدا بيقدر يعتبره ردح! ولا لما أحمد ماضي بينزل إنه أنا شو حكيت عنها بالمقابلة وهي ما قدرت تجيب سيرتي واسمي".
معاناة زياد برجي كـ ملحن وينهي حديثه بـ رُقي
وأضاف: "من مصلحتي أن أكون على أحسن علاقة مع إليسا وربما علاقتي السيئة ستكلفني الكثير، ممكن على صعيد اللي بيحبوها، وأنا أعوذ بالله من كلمة أنا، عشت 15 سنة من ورا الملحن ولسة بعاني منها لأن الشاعر والملحن بياكلو "بطاطا وبسطرما"، وبقيت ميال لكرامتهم ولا أقبل ما يجرحها، وحسيت بالا شعور وبالعفوية إني ميال للمعمل أكثر من أتخن مطرب وإني أكبر بعيون العالم أكبر من أتخن حفلة، وحياة بنتي ما بحكي أشعار، وأتشكركم على الفرصة وحبيت أن أترك مجالس السرية، كل ما هو مفيد بنحكيه وكل ما هو مضر نلتزم فيه طاقة الصمت وبنقول الحمدلله إنه بنقدر نكون من الكاظمين الغيظ".
وتابع: "أنا اخترت نادين الراسي لتصور معي الأغنية، لأنها بتعرف القصة كلها من أولها، ولأن زوجتي قالتلي إذا بدك تحكي قصتنا بدي نادين بس تمثلها، نحن جاوبنا الفن بالفن، والمسبات بالأدب، ورح جاوب عالأغنية بالأغنية، أرقى من هيك شو بدك مني؟ بتقطع علاقتك بصديق عبر الهاتف في أرقى من هيك؟ خلاص اللي بدي وصله للناس وصلته".
