علّق أحمد رمزي على الانتقادات التي وجّهها طارق الشناوي لمسلسل فخر الدلتا، مؤكدًا احترامه الكامل لرأيه، وذلك خلال لقائه مع ET بالعربي.
وقال رمزي: "رأي يُحترم طبعًا، أستاذ كبير، وإن شاء الله ناخد بالنا في العمل الجاي ويبقى أحسن وأحسن. لكن اللي حاسس بيه بجد إن العمل اللي جاي هيكون أفضل".
وأضاف متحدثًا عن تجربته في المسلسل: "أنا بجد أول مرة أسوق عربية، وعايزيني أجري على الطريق وسط ناس بتسوق بقالها عشرين سنة. أنا نازل وسط منافسة نجوم كبار، وأنا تقريبًا أول حد، أنا والكاست اللي معايا والمخرج كمان جديدين، وكل حاجة في التجربة جديدة، وده مش موجود في أي مسلسل في رمضان".
وتابع: "هي تجربة محترمة ونستحق إننا نسقفلها، وطبيعي يكون فيها أخطاء. الصعب في التجربة كان إزاي أحضّر للشخصية من غير افتعال، لأنها شخصية طبيعية جدًا، وده بيحتاج مجهود كبير عشان الناس تحس إن الشخص ده حقيقي. والقريب بيني وبين الشخصية إني شخص مكافح وبحب أنجح".
وعن مشاركة تارا عبود معه في العمل، قال رمزي: "بقول بجد ومش كلام قدام الكاميرا، أنا عمري ما كنت شايف حد في الدور غير تارا، واجتهدت جدًا في الدور. وساعات بحس بغيرة لما بشوف الآيباد بتاعها كاتبة عليه ملاحظات كتير، بس غيرة فنية طبعًا".
من جانبها، ردّت تارا عبود قائلة: "الغيرة متبادلة، أنا كمان بغير منه. إحنا طول الوقت بنتخانق، لكن قدام الناس بنبقى حلوين. وبصراحة الشغل مع رمزي كان تحفة، هو شخص ذكي جدًا وكاريزما، وبيجي له أفكار للمشاهد واتعلمت منه كتير".
