تداول رواد مواقع التواصل الاجتماعي خلال الساعات الماضية أخبار تفيد تدهور حالة ليلى طاهر الصحية، مما أدى إلى بتر قدميها، وتواصل فريق ET بالعربي معها للاطمئنان على صحتها ومعرفة حقيقة الأخبار المتداولة، لترد على الشائعات التي تلاحقها.
قالت ليلى طاهر في تسجيل صوتي لـ ET بالعربي: "أنا لسه عايشة يا جماعة، والله لسه عايشة، ورجلي متقطعتش ولا حاجة، عندي رجلين زي ما هما، مش عارفة هما عايزين إيه بالظبط".
تابعت ليلى في تصريحاتها "كل واحد يكتب على مزاجه كدة ويعلنها على الملأ، وينكد على الدنيا كلها وصاحبة الخبر نفسه، ليه هو إحنا أعداء".
وعبرت ليلى طاهر عن استيائها من الشائعات التي يتم تداولها قائلة: "بكره السوشيال ميديا، مبقتش عايزة أبص فيها خالص، وبنصح كل الناس متقراش حاجة من السوشيال ميديا، لأنهم مجرد ناس معندهاش ضمير وكذابين".
أشارت ليلى في تصريحاتها "مش أنا لوحدي ده كل الفنانين بيتكتب عنهم إشاعات، وبيكتبوا كلام في منتهى السوء، قرأت قبل كدة إنهم دخلوا حسين فهمي مستشفى المجانين"، وأضافت "هما بيشتغلوا على حسابنا، بيكتبوا أخبار سيئة زي دي عشان الناس تدخل وتقرأ إيه اللي حصل والتفاصيل، مين اللي مات ومين اللي اتكسر، ومين دخل مستشفى المجانين ومين جاله زهايمر".
