في اللقاء الإعلامي الأول له بعد وفاة ابنه وديع، أطل جورج وسوف في برنامج "مراحل" مع علي العلياني، تحدث فيه عن اللقاء الأخير بينه وبين ابنه الراحل.
متأثراً تحدث جورج وسوف عن الاتصال الأخير بينه وبين ابنه الراحل، وقال في رد ان كان يذكر آخر حديث بينهما قائلاً: "طبعاً بذكر، صحيت من النوم قالولي وديع راح المستشفى بدو يشوف الحكيم ويرجع. كلمته قالي بابا أنا نص ساعة.. انه راح يعمل فحص يشوفه بعد العملية كيف. قالي نص ساعة بكون بالبيت".
"وهي هالنص ساعة.. رحت عالمستشفى غايب عن الوعي، شفته بعيني انه مات قبل ما يقولوا مات"، أضاف جورج بغصة وقد أنهى عبارته بـ"الله يرحمه".
جورج وسوف "طول ما باخد نفس رح ضلني غني"
عن فكرة الاعتزال، قال: "أنا لا أكفر بنعم الله التي أعطاني ياها.. الله خلقني وأعطاني الموهبة من شان فرّح الناس وأسعدهم وغنيلهم.. طول ما أنا عم باخد نفس رح ضلني غني".
في اللقاء نفسه وصف جورج وسوف أصالة بالفنانة العظيمة ورداً على سؤال ان كانت قد سلمت عليه في كواليس حفل "تريو نايت"، قال: "أقسم بالله ما شفتها، حتى ما انتبهت ليه ما غنت معي عالمسرح.. جيت دغري قعدت 5 دقايق عالمسرح وما شفت حدا ونزلت من المسرح عالسيارة"، وأكد أنه سيسلم عليها، وتابع: "ما طلعت بوجهي أكيد بسلم عليها، حبيبة قلبي، ما في شي بيني وبينها. بيوم أنا كنت قاسي عليها شوي، كان كلامي شوي قاسي وهي كانت أذوق من الذوق معي، جاوبتني بكل لطافة وبكل إحساس حلو وقالت هيدا صديق أبوي، شو ما حكي بمون".
وأوضح: "أنا حكيت بمحبة وهي بتعرف هالشي.. لما مات وديع الله يرحمه تلفنت وعزتني وحكيتها أنا واتشكرتها.. أصالة بنت بلدي الأم وهي فنانة عظيمة".
لم تترك أصالة كلام أبو وديع يمر من دون تعليق بل عبّرت عن فرحها بتغريدة كتبت فيها: "شو بفرح لما بسمع عن إنسان غالي على قلبي وأستاذ ما بيتكرر هالكلام الحلو.. شكراً يا حبيب الحبيب، الله يحفظك ويطوّل بعمرك ويرحم صديقك (أبي)".
لم يندم جورج وسوف بتعليقه على لجنة تحكيم "ذا فويس"
بالعودة إلى الحلقة، لم يتراجع جورج وسوف عن كلامه بحق لجنة تحكيم "ذا فويس" وتحديداً نانسي عجرم وإليسا وأحلام وشيرين بأنهن لا يستحققن التواجد كأعضاء لجنة تحكيم، وقال: "أبداً ما قسيت. لجنة الحكم الي بدها تقيم شباب طالعة بدهم يصيروا فنانين، بدهم يكونوا ناس أكاديميين، بكونوا أكبر مني بكتير ومخضرمة بتعرف باللحن والمقامات.. الي ذكرتهن على راسي كلهن فنانات حلوين وشقوا طريقهن بشكل كتير حلو وعندهن أرشيف كتير حلو وعندهن جمهور لا يُستهان به".
"بدك واحد يعرف بالموسيقى أول شي، بعدهم شباب وصبايا صغار عم يغنوا برافو، في من الشباب الي عم يقيموا أوكي، في منهم الي بلحن وبيعزف عود وبيعرف المقامات.. مخضرم بالفن.. بدو يكون انسان بتشرف بالفن عن علم وعن فهم ليقيم واحد عم يغني"، قال الوسوف، وأكد أنه لا يشعر بالندم أبداً بسبب هذا الرأي، وأوضح: "أنا ما هنت بكل احترام حكيت أنا".
