أكثر من 12 مليون مشاهدة حتى الآن للقاء باسم يوسف مع الإعلامي البريطاني الأشهر بيرس مورغان والذي ناقش فيه الأحداث التي تشهدها فلسطين بطريقته الخاصة.
هذا غير ملايين المشاهدات على المقاطع المنتشرة وتصدره عناوين الصحافة الغربية والعربية وترندات السوشيال ميديا، حيث أشاد به الجمهور وتداولوا لقطات كثيرة حول أسلوب باسم الساخر والجاد والمراوغ ، والذي استطاع أن يطرح من خلاله قضيته ويوصلها بأسلوب الغرب، لينتهي الأمر برسالة من مورغان "شكرا باسم. أود أن أجلس معك شخصيًا في الجولة الثانية. لديك صوت قوي ومهم في هذه الأزمة…".
باسم يوسف يرد على منتقدي محمد صلاح
باسم بدوره علق على ردود فعل الجمهور والإشادات التي تلقاها والتي جاءت أيضاً بالتزامن مع فيديو محمد صلاح الذي ظهر فيه ليلة أمس وهو يدعم الشعب الفلسطيني بطريقته الخاصة أيضاً .
وشارك باسم يوسف صورته مع محمد صلاح، معلقاً عبر الفيسبوك: "انا شفت الصورة دي في كذا صفحة مع تعليق: محمد صلاح متصور مع فخر العرب، ده غير بوستات تانية كتيرة جدا يا اما بتقارن لقائي مع الفيديو بتاعه او بتقلل و تهمش و تتريق على فيديو صلاح…"
وفي نقاط عديدة.. أوضح "يوسف" قائلاً: "المفروض في عالم طبيعي ان لعيب الكورة أو حتى الكوميديان يكونوا في الصفوف الأولى للدفاع عن القضايا الانسانية. ده دور الاعلام . والسبب ان اللي بيحصل غير كده ان الاعلام بيفشل في ده بل و بيزيد الامور سوءا فتتجه الناس للاشخاص الناجحين في مجالهم عشان يغطوا على فشل في مجال مش بتاعهم و ده اول السكة في اننا بنظلمهم معانا. صلاح لعيب كورة . لا يتدخل في السياسة من اول يوم. و لا ، احتفاله بالكريسماس مش رسالة سياسية. الاحتفال بأي مناسبة ده نشاط انساني بحت و لا يجب مقارنة صورة جنب شجرة كريسماس او حلويات المولد بوضع علم او رمز للتضامن".
وأضاف باسم يوسف: "تعزيته في موت ملكة انجلترا هو ايضا فعل انساني و ليس سياسي. صلاح او اي لاعب كرة لو كان بيلعب في دوريات الخليج و لاقدر الله لو أمير او ملك او شيخ او حاكم الدولة او الامارة او المحافظة اللي فريقه بيلعب له توفاه الله كان حيكتب تعزية برضة لأن ملكة انجلترا عند الانجليز اللي بيلعب عندهم مكانتها في قلوب ناس كتير جدا زي مكانة هذا الملك او الامير في قلب شعبه. فده بروتوكول و ليس فعل سياسي".
وتابع: "مقارنة فيديو صلاح باللقاء بتاعي هو ظلم بين. لأن الكلام مش شغلة صلاح. و لأن طلاقة اللغة مش شغلة صلاح. لا صلاح حيعرف يتكلم و يحاور زيي و لا انا اقدر العب كورة زي صلاح. يا جدعان ده انا اكبر انجازاتي الكروية اني عملت تلات عمليات غضروف و انا عندي ركبتين اتنين بس!!!! ده انا خدت كباري بعدد شعر راسي. و لو على اللغة، صلاح ، اللي ما دخلش مدارس لغات زيي بيتكلم ايطالي. انا معرفش كلمتين ايطالي على بعض".
واستكمل: "صلاح بالانجليزي المكسر و الاداء “الفلات” او المخطوف زي ما ناس وصفته، الاداء “الوحش” ده عمل ملايين التفاعلات و المشاهدات . كونه بقى ان :الكلام مايع ، مافيش ادانة واضحة، مسك العصاية من النص. قصف الجبهات مش دور صلاح خالص . و اصلا هو فيديو غير موجه لينا. و رب فيديو بسيط من غير عياط و من غير نرفزة و من غير شتيمة و من غير ادانات و شجب و عياط و دموع لكن يوصل برة و يغير صوت واحد ده ابرك بكتير".
وأشار إلى أن: "واحد زي صلاح، ملهم لأجيال كتيرة قصة كفاح غير مسبوقة ، راجل بيتبرع في السر اكتر من العلن، فاتح بيوت انا و انتم مش عارفين عددها.، واحد زي ده نخسره ليه؟ عشان ما شفاش غليلك في قضية بقالها ييجي ميت سنة اعتى الانظمة و اكبر الدول فشلوا فيها؟ أتأخر؟ ياسيدي المهم انه وصل. مش قوي بما فيه الكفاية؟ اه بالنسبة لك ، لكن بالنسبة لناس كتيرة قوي قوي قوي دي ممكن يكون اول مرة يسمعوا فيها عن القضية. الدنيا برة غير خالص الوطن العربي عندنا بس ده له بوست لوحده".
وقال: "فاكرين لما صلاح نزل صورته في القدس و كتب تضامن؟ اتشتم برضة. طيب لما يبقى عندنا واحد بوزن صلاح و كل شوية نشتمه عشان ماعملش اللي احنا عشمانين فيه، طيب على الاقل لو ما شجعناش صلاح مش لازم ندوس عليه. صلاح مش المفروض يكون هو هدف لغضبك.
- انا مريت بالفترة دي: ساكت ليه، ما تعمل زي فلان ما تقول زي علان؟ كل واحد و ظروفه و حساباته . لا يكلف الله نفسا الا وسعها. كل واحد ادرى بالضغوط اللي عليه. بلاش نكون احنا كمان سبب زيادة في الضغط عليه.
وفي ختام منشوره، قال باسم يوسف: "في الأخر كل واحد و رأيه. كل واحد يحب و يكره اللي هو عايزه. لو حبيت صلاح او كرهته انت حر، البوست ده مش حيغير حاجة. و دي صورتي مع فخر العرب ، محمد صلاح".
