بعد تصريح روتانا باستعدادهم للصلح مع شيرين، شاركت شيرين في برنامج الحكاية الذي يقدمه عمرو أديب بمكالمة هاتفية و ردت فيها على الكثير من الأسئلة.
فجاء رد شيرين على إستعداد روتانا للصلح بالرفض التام و قالت "في مؤامرة إني أقعد في البيت، أنا قلت في آخر مؤتمر صحفي الأغاني جاهزة و هما مش بينزلوها، و النجاح اللي أنا فيه دلوقتي ده بسبب الناس و بهدي أغانيا للناس ببلاش، و صوتي مش هيقف و مش محتاجة أتعاقد مع أي شركة".
كما ردت على كلام روتانا قائلة "انا اتعاقدت معاهم و انا نجمة، ما حدش عملني نجمة"، و صرحت أيضا قائلة "روتانا رفضت إستلام الأغاني لأنها عايزة شيرين حصري في الحفلات، يعني اللي عايز شيرين في حفلة لازم يكلم روتانا الأول، و ده ما كنش اتفاقنا".
ورداً على سؤال عمرو عن الحل المناسب قالت شيرين "آخر تليفون بيني و بين طوني سمعان، قلتله اسأل سالم الهندي تاخد كام و تحلوا عني، و كان رده عايز الشرط الجزائي و تعويض"، ثم تابعت كلامها مستنكره "تعويض هو اللي يحدده ما انا تحت أمره ما هو إشتراني".
و عن شروط فسخ العقد قالت شيرين "أول حاجة هو عدم وجود دعاية، حد منهم يقدم ورق يقول إنه عملي دعاية بـ 5 جنيه !، عقدي مفروض يتفسخ بسبب إخلالهم بالشرط ده، مفروض يتعمل دعايا بحجم النجم اللي معاهم"، كما أضافت "انا ماضية عقد فيه 12 اغنية، و مفروض ينزلوا البوم هما نزلوهم سينجلز، و ده اخلال تاني بالعقد".
أيضاً شاهد في تقرير سابق.. شيرين عبد الوهاب تتحدى و روتانا تصّعد
وعن وقف الأغاني قالت شيرين "ده أذى، و أنا بناشد بلدي أنها تحميني، هما فاكرني ضعيفة لأني كنت ساكتة، بس أنا مش ضعيفة، و هما واصلين في الأذى".
وفي النهاية طمأنت الجمهور عليها قائلة "انا فله شمعة منورة، و بشكر كل الناس اللي بتسأل عليا، أنا قلبي وجعني من يومين من كتر ما انا مش مصدقة النجاح ده، انا ربنا كرمني اوي" و أكدت على إنتهاء علاقتها بحسام حبيب حبنما سألها عمرو "كل حاجة تانية خلصت و انتهت ؟" قائلة "أيوة أيوة.. و ربنا يوفقه و يسعده و يكرمه".
