تعرضت إلهام شاهين، لموجة من الانتقادات خلال الساعات الماضية، بسبب تصريحها عن فلسطين، أثناء تكريمها من مهرجان للمونو دارما، حيث قالت:"أحنا الشعوب العربية ننادي بالسلام، السلام ثم السلام ثم السلام، احنا مش شعوب بتنادي أبدا بالحرب، والحل بسيط جدا، هو حل الدولتين يبقي في دولة فلسطين، ويبقي برده إسرائيل موجودة".
وتواصل ET بالعربي مع إلهام شاهين، للرد على الهجوم بسبب تصريحاتها، حيث قالت:"كلامي كله كان تعاطف مع فلسطين، وكان واضح وأنا بقول قلوبنا موجعة على كل اللي بيحصل في فلسطين ولبنان وكل الدول العربية، وحل الدولتين دي مسألة مؤقتة حقن للدماء، وأولا في دول كتيرة في أوروبا أعترفت بفلسطين، فانا عايزين قيام الدولة الفلسطينية".
وأضافت:"وقولت لن تهدأ الشعوب العربية إلا بقيام الدولة الفلسطينية، المكاسب القريبة دلوقتي اللي ممكن نحصل عليها دلوقتي قيام الدولة الفلسطينية، حتي لو إسرائيل موجودة، وبعد كدا ممكن لو قدروا يخرجوا الـ 7 مليون إسرائيلي من البلد يبقى إنجاز عظيم، والوطن العربي ساعتها هيبقى مبسوط، لأن إسرائيل ليست عدو لفلسطين فقط ولكن هي عدو الوطن العربي كله".
وتابعت إلهام شاهين:"دا كلامي والمقصود منه، وكل كلامي تعاطف مع فلسطين ولبنان والبلاد العربية، وأنا أول واحدة ضد إسرائيل كلامي واضح، أرجعوا للفيديو كامل مش إجزاء، وكان ببساطة أنا ممكن انا في حفلة بتكرم فيها، كان ممكن أتكلم عن مسيرتي وأمجادي اللي انا عملتها، اللي استحق عليها التكريم، ومتكلمش عن فلسطين".
وأستطردت:"وكانت التعليقات هتبقى هو انتي فرحانة باني انتي في حفلة وبتتكرمي ومش حاسة باللي بيحصل في غزة ولبنان، فانا عايز أقولكم احنا معاكم وحاسين بيكم، المفروض نيتي خير اني أقولكم اننا متعاطفين معاكم، وأول جملة قولتها أنا كان المفروض أبقي فرحانة النهاردة، بس مش قادرة بسبب اللي بيحصل في المنطقة من حروب وصراعات، وكلامي كان كله تعاطف مع فلسطين ولبنان".
