شوّق أحمد سعد اليوم السبت جمهوره لألبومه الغنائي الجديد والمنتظر، والمُقرر إطلاقه في 15 يناير الجاري تحت عنوان "حبيبنا".
وبشكل جديد ومبتكر، شارك أحمد في 11 يناير 2025 فيديو دعائي طويل عبر حساباته على السوشيال ميديا، حيث تحدث عن حلمه في البدايات مُسترجعاً ذكرياته منذ اكتشاف حبّه للموسيقى في الصغر.
أحمد سعد في إعلان ألبوم "حبيبنا" : "هاخد الناس وأطير في السما"
بدأ سعد الفيديو بمشاهد مميزة من منطقة القاهرة التراثية، وتحدث فيه عن بدايات حلمه قائلاً :"حاجة جميل أوي إنو يكون عندك حلم والأجمل من كده أنك تحققه، طول عمري أحلامي ملهاش سقف".
تابع : "وأنا صغير كنت بحب المزيكا أوي، كنت بشوف كل حاجة ألحان، حتى الكلام كنت بشوفه لحن، كانوا أخواتي بيستغربوا جداً وأنا صغير، إزاي طفل يحفظ الحاجات التقيلة دي".
ثم أضاف : "كنت بسمع مشايخ وأم كلثوم وعبد الوهاب، وكنت بسأل نفسي هتغني إيه فيهم، كنت بسمع كل أنواع الموسيقى عشان ألاقي لنفسي شكل، الناس تحبني بيه".
أحمد أكمل قصته في الفيديو قائلاً: "واتصدمت أول صدمة، عرفت إن الطريق مش سهل، انا محتاج الناس تحبني، وفضلت أسعى وأسعى وأعمل أشكال جديدة في المزيكا بحبها، بس ما كانتش كل الناس بتحبها، قعدت 15 سنة بجرّب، بعمل اللي بحبه واللي الناس بتحبه وأشوف زمايلي بتعمل إيه عشان أعرف ذوق الناس".
ثم تابع : "إحترت بصراحة، ما كنتش عارف أعمل إيه، وصلت إن أعمل اللي الناس بتحبه بالطريقة اللي بحبّها، وحصل النجاح، ما جاش من يوم وليلة".
ووصف سعد إحساسه بالنجاح فقال : "ناس بقت تحبني وناس بقت تحب أغانيا، وبقيت ببقى طاير في السما وأنا واقف عالمسرح .. لأ طاير بجد، والناس بتغني ورايا وبتقول إيه اليوم الحلو ده، ووسّع وسّع، بس عرفت إن المسؤولية ابتدت".
كما ختم المقطع قائلاً : "أنا محتاج زي ما أنا بعمل اللي بناس بتحبه، كمان أعمل لي أنا بحبه، وأنا مصدق إن اللي بتحبه من قلبك الناس أكيد هتحبّه معاك، وهي دي تجربتي المرة دي، هاخد الناس وأطير في السما، باللي أنا بحبّو، الأيام الجاية هتعرفوا أيه هي التجربة".
شاهد تقرير سابق : أحمد سعد في مهرجان ميدل بيست باطلالة مهندس بناء
