تفاعل كبير شهدته منصات التواصل الاجتماعي خلال الساعات الأخيرة، عقب انتشار صور ومقاطع فيديو من حفل زفاف أسما شريف منير، والذي جاء في أجواء تجمع بين الرقي والبساطة، وسط حضور عدد محدود من الأصدقاء المقربين.
أسما شريف منير تعلق على خبر زواجها
و عبّرت أسما في اتصال مع ET بالعربي عن امتنانها العميق بعد الإعلان عن دخولها مرحلة جديدة من حياتها، مؤكدة أن ما تعيشه اليوم هو "استجابة دعاء" طالما تردّد في قلبها لسنوات.
وقالت أسما: "لا أجد الكلمات الكافية لوصف ما أشعر به، لكن كل ما أعرفه هو أنني ممتنة من أعماق قلبي. ما كنت أراه حلمًا بعيدًا، تحقق أخيرًا. دعوت الله كثيرًا أن يرزقني إنسانًا طيبًا، يحترمني ويخاف الله فيّ وفي بنتي. واليوم أستطيع أن أقول إن الله استجاب."
أسما وصفت هذه المرحلة بأنها عوض جميل بعد سنوات من التعب، مشيرة إلى أن الزوج الجديد ليس فقط شريك حياة، بل شخص "محترم، خلوق، وقريب من ربنا"، وأضافت: "لم أتوقع أن أحصل على هذا الكم من الحب والدعم من الناس. الرسائل التي وصلتني كانت صادقة وتفوق الخيال. شعرت وكأنني أملك مليون أخت ومليون قلب بيحبني بصدق."
وتابعت أسما كلامها بلهجة مؤثرة، قائلة:كل اللي كتبولي: (أنا عيطت لما شفت البوست)، (أنا حاسّة إنك بنت خالتي)، (فرحتلك من قلبي)، حسيت إنهم عايشين معايا اللحظة من قلبهم."
وتحدثت أسما أيضًا عن التحولات التي عاشتها خلال السنوات الماضية، والدروس التي تعلمتها من التجارب والعلاقات والتحديات، مؤكدة أن التوكل على الله كان دائمًا بوصلتها.
"كل مرة كنت أحاول أرتب الأمور بطريقتي، كنت أرجع وأقول: توكلت عليك يارب، اختارلي ولا تخيرني. وفي كل مرة، الطريق اللي ربنا بيختاره كان أجمل من أي حاجة كنت أتخيلها."
وختمت أسما رسالتها برسالة شكر لكل من ساندها في هذه الرحلة: "الحمد لله على كل شيء، وشكرًا من قلبي لكل من أرسل لي كلمة طيبة أو دعوة أو حتى ابتسامة صادقة. اليوم أشعر بسلام داخلي وامتنان لا يوصف."
وخطفت أسما الأنظار بإطلالة أنيقة، حيث ارتدت فستان زفاف بتصميم راقٍ، امتاز بالبساطة والتطريز اليدوي، مع قصة كتف مكشوف ناعمة، ما جعل اسمها يتصدر مؤشرات البحث بعد مشاركتها لمجموعة من صور الحفل عبر حساباتها الرسمية على مواقع التواصل الاجتماعي.
ومن خلال منشور على "إنستقرام"، أعلنت أسما زواجها، قائلة:" أنا الحمد لله اتجوزت، وده قرار جه بعد فترة طويلة من رحلة عشتها مع نفسي، من حاجات كتير قوي اتعلمتها، تجارب دخلت فيها، اختيارات وصلت لها، حاجات بقيت بحبها، وحاجات ما بقيتش بحبها. فهمت نفسي أكتر، اتعرفت على نفسي أكتر، فهمت أنا محتاجة إيه من الجواز، إيه المهم وإيه اللي مش مهم، إيه اللي محتاج مجهود وإيه اللي مش محتاج مجهود، وقعدت فترة كبيرة جداً بدعي ربنا بإنه يعوضني خير ويعوضني خير صبري، لأني كنت في الفترة دي بحاول أقصى حاجة في الدنيا إني أحافظ على نفسي وما أغضبش ربنا".
وأضافت:"وحاولت إني أدعي ربنا كتير قوي إنه يقف جنبي ويختار لي، وكنت دايماً بقول: يا رب اختار لي ولا تخيرني، وكنت مركزة جداً في موضوع إني أتعامل بالتوكل، وتوكلت على ربنا تماماً في القرار ده، وتعاملت على إنه هو اللي هيجوزني وهو اللي هيقول لي أعمل إيه، قلت له: سهل لي الطرق المعينة اللي أنت عايزني أعملها، أنا نيتي خير ومش عايزة أعمل حاجة غلط وعايزة أتجوز وأتستر وأعيش حياة كريمة فيها احترام وفيها تقدير وفيها عوض، وكلمت مع ربنا كتير لحد ما جه وقت صدقت جداً وكان عندي يقين غير عادي إن ربنا هيحقق لي الحاجة دي، لأني كنت عديت بفترة تعب كبيرة قوي نفسي علشان أقدر أتخطى ده، كان بفكرة إنه صحيت نفسي في الشغل وتوكلت على ربنا ومقررة إنه هو هيختار لي الأصلح".
وتابعت أسما شريف منير:"وده اللي حصل عمري ما كنت أتخيل إني هتعرف على أحمد إزاي ولا إن إحنا لما تعرفنا على بعض إن إحنا كنا هنتجوز أصلاً أو أي حاجة، وحتى أنا بيني وبين نفسي، عشان كان عندي يقين، كنت عارفة إني هتجوز، وكنت قايلة إن أنا هتجوز في تاريخ معين يوم 25-5-5، كنت خلاص بقول للناس كلها إن ده يوم فرحي وإن أنا هتجوز اليوم ده، وأصلاً ما كانش فيه حد في حياتي خالص، من كتر يقيني إن ربنا هيبعت لي حد وإنه هيرزقني بالزواج الصالح اللي يريح قلبي ويعوضني ويحسسني بالأمان وبالاحترام وبالاحتواء، واللي شدني في أحمد إنه قريب من ربنا و بيغيرش الحقايق، وعارف مسؤولياته تجاه ربنا و عيلته، وعارف معاملاته تجاه ربنا عاملة إزاي، فلقيت الشخص اللي ممكن يبقى بيعامل الناس وجواه سالك، جواه إيمان، ده حد تقدر تثق فيه وتحس إنه تقدر تبني معاه حياة وإنت متطمن، أكيد بنتضايق ونزعل من بعض، احنا الاتنين فينا عيوب وكل حاجة زي كل البشر، بس فكرة إن الاختيار نفسه ربنا وفقني فيه و سهلها من عنده، يا رب يبقي خير، لحد ما أموت يبقى هو في حياتي".
وخلال عقد القران، وجّه شريف منير رسالة مؤثرة إلى زوج ابنته، عبّر فيها عن حبه وامتنانه لأسما، مؤكدًا أنها كانت دائمًا مصدر دعم له. وقال: "هي مش بس بنتي.. دي كانت دايمًا واقفة جنبي وبتوجهني. مش عايز منك غير إنك تحتويها، وتكون جنبها، لأن في يوم من الأيام مش هبقى موجود، وعايز أكون مطمن عليها".
