في لقاء مع ET بالعربي من حفل DAF BAMA MUSIC AWARDS، أعلنت Helly Luv عن فيلمها الجديد "Don't Forget Me"، اللي كتبته وأخرجته وبتمثل فيه، وقالت ممازحة: "كانوا يقولوا بالموقع لو فيني أمسك الكاميرا، كنت عملت كل شي لحالي!".
الفيلم مستوحى من قصة حقيقية وتجربة شخصية عاشتها Helly، لأنها وُلدت وسط الحرب في إيران ونشأت كلاجئة، وقالت: "شفت كتير، وعيلتي شافت كتير… بس الأهم إنك تآمن بنفسك وما توقف تحلم".
Helly اللي اشتهرت بأغانيها الجريئة ومواقفها الصريحة، عندها أكتر من 6 مليون متابع على إنستغرام، وبتحقق ملايين المشاهدات على أعمالها.
وخلال الحفل، تم تكريمها بجائزة أفضل فنانة كردية، وعبّرت عن امتنانها، خاصة إن بدايتها الفنية كانت من ألمانيا، لما وقّعت أول عقد مع Sony.
وأطلت بفستان أسود مطرّز وتسريحة شعر مموجة، ووصفت لوكها بأنه مزيج من "قوة، هوية، وستايل كردي".
Helly اختيرت عام 2015 من مجلة Foreign Policy ضمن "أهم 100 مفكر عالمي"، وأكدت إن للفنان دور ورسالة، وقالت: "لازم نحكي لما في شي غلط… من فلسطين لأي مكان، نحنا بشر وما في فرق بيناتنا".
