في عرض خاص لفيلم "الشاطر"، عبّر النجم أمير كرارة عن سعادته بالعودة للكوميديا الممزوجة بالأكشن، واعتبر أن الجمهور بحاجة لجرعة خفيفة ولطيفة بعيدًا عن الضغوط، وقال: "الناس زهقانة ومخنوقة، واللطافة بقت مطلوبة.. الكوميديا أصعب من الأكشن بالنسبة لي، بس بتريح الدماغ".
فيلم "الشاطر" يُعد ثاني تجربة لكرارة في الكوميديا بعد "البعبع"، لكنه شاف إنه مختلف تمامًا: "ده أول تجربة حقيقية ليا في النوع ده.. في ميزان مظبوط للكوميديا، ومواقف هيعجب بيها الكبار والصغيرين".
هنا الزاهد، بطلة الفيلم، خاضت مشاهد مليانة تحديات، وقالت: "اشتغلت كذا شغلانة في الفيلم مش في السيرك، بس طبعًا كان في مشاهد صعبة أوي تحت المية، ومشاهد كانت صعبة أوي على الموتسيكل، وأنا بخاف من السرعة جدًا، عندي فوبيا من السرعة... الحمد لله عدت يعني. مشاهد الأكشن كانت صعبة أوي بس حلوة، يعني في الآخر بقيت عايزة مشاهد الأكشن. رجلي اتحرقت، بس قشطة عادي."
الفيلم من تأليف كريم يوسف، وبتدور قصته حول شاب بيلاقي نفسه في المكان الغلط والتوقيت الغلط، وبيحاول يخرج من الورطة من غير خسائر، في قالب أكشن خفيف ومليء بالمواقف الكوميدية.
والمفاجأة الكبيرة كانت بتتر الفيلم، من خلال ديو غنائي جمع سعد لمجرد وبوسي بعنوان "الشقاوة". وقالت بوسي عن التعاون: "المشروع كان من زمان، وكنا مستنيين الأغنية المناسبة، والحمد لله حصل التوافق بين لوني ولون سعد".
الأجواء بالعرض الخاص كانت مرحة، خصوصًا بعد ظهور ابن أمير كرارة، سليم كرارة، اللي بارك لوالده وقال: "إن شاء الله الفيلم يعجب كل الناس ويجيب إيرادات حلوة يا بابا!".
