شهد المؤتمر الصحفي للإعلان عن الشراكة بين شركة العدل جروب ستوديوز وشركة Hyde Park للتطوير العقاري، الكشف عن أحدث إنتاج مسرحي غنائي بعنوان " أم كلثوم.. دايبين في صوت الست"، بحضور صنّاع العمل وفريقه.
المسرحية من تأليف مدحت العدل، ومن المقرر أن تنطلق عروضها في الثالث من أكتوبر/ تشرين الأول المقبل بمدينة السادس من أكتوبر، حيث تسعى لتقديم رؤية جديدة ومختلفة لكوكب الشرق أم كلثوم، عبر التركيز على تفاصيل إنسانية لم تُعرض من قبل، مع استخدام أحدث التقنيات البصرية والصوتية على خشبة المسرح.
مسرحية أم كلثوم.. دايبين في صوت الست
مدحت العدل: "إزاي هنبقى مختلفين عن اللي اتعمل قبل كده؟"
الدكتور مدحت العدل أوضح خلال لقائه مع ET بالعربي التحديات التي واجهته عند كتابة النص قائلاً: "مين يعمل أم كلثوم؟ هنقدّم على المسرح حاجات كتير جداً.. إزاي هنبقى مختلفين عن اللي اتقدّم؟ واحدة هيتقدّم 75 سنة من الصعود إلى القمة دون النزول خطوة.. هتقدمي دي إزاي في ساعتين؟ وإزاي هتبهري الناس؟ إزاي؟".
وعن اختيار البطلة الصغيرة التي ستجسّد شخصية أم كلثوم في بداياتها، قال: "بصي، ما إحنا عندنا اتنين بيعملوا مكلسوم.. واحدة صغيرة وواحدة فترة الشباب، وهي نفسها اللي بنكبرها. الاتنين طبعاً ما شاء الله، إن شاء الله أصوات عظيمة يعني. بس البنت الصغيرة تحديداً بعتها لي سليم سحاب، لأنه بيلف مصر يدور على صوت، فبعت لي بنت هي تاخد القلب".
أما عن الأخبار التي تحدّثت عن احتمال مشاركة حفيدة أم كلثوم في العمل، فقد علّق: "أنا بصراحة ما عرضتش، أنا سمعت إنها بتغني، وبعدين سمعت إنها اعتزلت. كل ده كلام.. أنا لا شُفتها ولا سمعتها، ومش عايز أفتح الموضوع تاني".
أحمد فؤاد: "حياتها ما تعملش في مسرحية واحدة"
أما المخرج أحمد فؤاد أشار إلى صعوبة تلخيص مسيرة أم كلثوم في عرض واحد: "أصعب حاجة الزخم.. إن هي عندها تاريخ حافل جداً مش بس على مستوى الأغاني. يعني حياتها كانت مليانة جداً بالتفاصيل. أنا اكتشفتها كل شوية.. اللي هو: يا جماعة دي ضخمة جداً! هنقول إيه ولا إيه؟ فبعض الدكتور مدحت في جلسات عمل شديدة جداً كان لازم يحدد إيه اللي يتقال من الست. لأن حياتها ما تعملش في مسرحية ميوزيكال.. يتعمل فيها 20 مسرحية ويتعمل فيها 50 مسلسل".
خالد الكمار: "الأغاني متضفّرة في الدراما"
بدوره، كشف الملحن خالد الكمار عن الجانب الموسيقي قائلاً: "إحنا اتفقنا من الأول خالص إننا عايزين نقسّم الموضوع لكذا شِق. في شِق أغاني أم كلثوم الأوريجن اللي إحنا عارفينها: الأطلال، إنت عمري.. والحاجات دي مقدسات مش هنقرب لها. بس غير كده، إحنا أضفنا بقى أغاني جديدة.. حوالي 12 أو 13 أغنية، والأغاني الحقيقة كلها متضفرة في الدراما بشكل بديع جداً. وده طبعاً يرجع لدكتور مدحت هو اللي كاتب، بحيث إن هي مش المسرحية بيتخللها أغاني، لا.. دي الدراما كلها بتحصل أصلاً في الأغاني. يعني إحنا بنعرف الأحداث من الأغاني. كان هدفنا إن هو إيه.. أم كلثوم على المسرح بتغني الأغاني العظيمة دي جداً، ولكن في حياتها الشخصية بقى.. ما تمرّ به كإنسانة، ده بنعبر عنه بأغانينا إحنا".
"أم كلثوم مش مجرد صوت"
الجدير بالذكر أن شركة العدل جروب كانت قد نشرت قبل أيام البوستر الرسمي للمسرحية عبر صفحاتها على مواقع التواصل الاجتماعي، معلّقة: "أم كلثوم مش مجرد صوت.. دي رحلة عمر مليانة أسرار وحكايات، رحلة رسمت تاريخ وخلّت اسمها يعيش جوة القلوب لحد النهاردة. البوستر الرسمي لمسرحية أم كلثوم.. قريباً على المسرح".
