في حديث خاص لـ ET بالعربي، شاركت زينة رسالة صوتية تحدثت فيها بصراحة عن الحادثة التي تعرضت لها خلال تصوير مسلسلها الجديد “ورد وشوكولاتة”.
زينة : "وقعت في التصوير… شرخ في الركبة"
في البداية، شرحت زينة قائِلة: «أولاً شكراً على سؤالكم وميرسي قوي … أنا بقيت كويسة دلوقتي الحمد لله أحسن كتير جداً. أنا وقعت في التصوير، كنت بعمل مشهد وبعدين عملنا بروفا تمام “أكشن” فجأة في حاجة في الأرض زحلقتني طرت في الهواء وقعت على نصي الشمال كله وحصلي شرخ في الركبة".
وبالفعل أكّدت أنها تحفظت على نفسها بعد الحادث، إذ أضافت: "حطيت ركبة كبيرة على رجلي لأنه ما كانش ينفع أن أنا أعمل جبس — الركبة مالهاش جبس خالص ما ينفعش لأن ده مفصل".
الانتقال إلى فترة الراحة "ورد وشوكولاتة" توقّف مؤقت
ثم أوضحت زينة أن الحادثة تزامنت مع انتقال مواقع التصوير: "ساعتها احنا كنا بننقل من ديكور لديكور فكنا على بال ما هنبني الديكور الجديد كنا أورد يي عندنا واقفة أسبوعين ففضلت قاعدة في البيت أسبوعين التصوير كله يعني كان إجازة مش أنا بس".
وأضافت أن فريق العمل بدأ التصوير من دونها: "وبعدين هم بدأوا التصوير من غيري أول حوالي أربع أيام من غيري وبعدين رجعت أنا بقى صورت".
التحدي والصبر: "اتماسكّت شويّة… والدكتور اتخانق معايا"
وأضافت زينة: "كنت بحاول أن أنا يعني اتماسك شويّة لغاية ما الدكتور بتاعي اتخانق معايا قلت له خلاص أنا فاضل لي أسبوع وأخلص".
وشكرت زينة الطبيب ومن ساندها: "بشكر دكتوري جداً بقول له ميرسي على تعبك، وبشكر كل الناس اللي خافت عليّ أولهم كرو العمل بتاعي أنه كلهم جريوا بيا على المستشفى وعملوا اللازم والزيادة كل الناس اللي وراء الكاميرا".
كما أشارت إلى مساعدة من بين زميلاتها: "وبشكر مها نصار لأنها كانت من أوائل الناس اللي جت لأنها كانت بتجري ورايا في المشهد".
وختمت زينة رسالتها بصوت مليء بالأمل والتفاؤل: "بشكركم على سؤالكم وبقول لكم ورد وشوكولاتة استنّوه هو هيجي بكره إن شاء الله على يانغو وهو من أعمال يانغو الأصلية وإن شاء الله هيعجبكم، لأني أنا تعبت فيه قوي قوي قوي قوي… بشكر كل الكرو بتاع المسلسل وبقول لهم يا رب ربنا يكتب لنا كلنا النجاح إن شاء الله".
