كشف محمد إمام عن تفاصيل مسلسله الجديد "الكينج"، وذلك خلال لقائه مع ET بالعربي، متحدثًا عن كواليس العمل، وحماسه الكبير للتجربة، وطبيعة المنافسة في الدراما خلال الفترة المقبلة.
وقال محمد إمام:"الحمدلله الناس كلها بتقولي دلوقتي يا كينج، ولكن الكينج محمد منير ده حتة تانية طبعًا، منقدرش حتى نيجي جنبه، بس هو الاسم لائق عليا وعلى الشخصية والأحداث، والاسم شدّني بصراحة، وهتشوفوا مسلسل جامد جدًا إن شاء الله".
وأوضح إمام أن العمل يضم فريقًا كبيرًا من النجوم، مؤكدًا أن الجميع يبذل أقصى جهده من أجل تقديم عمل يليق بالجمهور العربي، قائلًا:"ومعايا كاست وفريق عمل رائع جدًا من أكبر النجوم في الوطن العربي، وكلنا بنبذل مجهود عشان نطلع أحلى حاجة عندنا والله العظيم".
وتحدث محمد إمام عن أهمية السوشيال ميديا ودورها في نجاح الأعمال الفنية، مشددًا على أن النجاح لا يُنسب لفرد واحد، بل هو ثمرة مجهود جماعي، قائلاً:"السوشيال ميديا مهمة جدًا، وأنا حابب العمل أوي، والنجاح ده مش بتاع حد لوحده، ده بتاع الكل، إنما الفشل حد واحد بس اللي بيشيله، والعمل الناجح دايمًا بيبقى وراه منظومة كاملة".
وأضاف أن ظروف التصوير ليست سهلة، لكن الجميع يعمل بروح واحدة من أجل الخروج بعمل يرضي الجمهور:"بنصور في ظروف صعبة، وكل واحد فينا بيطلع اللي عنده علشان نطلع حاجة حلوة وتعجب الناس".
وعن المنافسة داخل الوسط الفني، أكد محمد إمام أنها في النهاية تصب في مصلحة الجمهور، موضحًا:"إحنا جيلنا كله حبايب، واللي قبلنا كمان، وكلنا شغالين علشان نبسط الجمهور، المنافسة طبيعي تبقى موجودة، لكنها في صالح الجمهور".
وأشار إلى أن لقب "نمبر وان" يظل مرتبطًا باسم الزعيم عادل إمام فقط، قائلًا:"مفيش حد نمبر وان في الوسط غير عادل إمام، وكل واحد شايف نفسه رقم واحد وده شيء صحي، لأنه بيخلي كل واحد يطلع أحسن ما عنده".
وفي ختام حديثه، كشف محمد إمام عن مشاريعه السينمائية المقبلة، حيث أشار إلى انتهائه من تصوير فيلم "صقر كناريا" مع شيكو، واستعداده لبدء تصوير "شمس الزناتي"، واعدًا الجمهور بمفاجآت قوية خلال الفترة المقبلة.
