في رمضان 2026، يعود المداح في موسمه السادس بعنوان "أسطورة النهاية"، لكن حمادة هلال يرى الصورة من زاوية مختلفة تمامًا، ويؤكد لـ ET بالعربي أن ما يحدث اليوم هو أشبه بانطلاقة جديدة للسلسلة، لا مجرد استكمال لنجاح سابق.
بالتزامن مع انطلاق عرضه ودخوله في لائحة الترند.. ET بالعربي في كواليس مسلسل المداح 6 أسطورة النهاية وحمادة هلال يكشف عن صابر الجديد وحكاية عائلته المختلفة، وأحداث غير متوقعة.. تابعوا اللقاء 👇
ما الذي تغيّر في صابر بمسلسل المداح 6 أسطورة النهاية؟
حمادة هلال: "إحنا كنا واخدين قرار إن الخامس هو الأخير"
حمادة هلال يكشف أن قرار إنهاء العمل لم يكن وليد اللحظة، بل كان مطروحًا منذ الجزء الرابع، قائلاً: "إحنا لما خلاص كنا واخدين قرار إن الجزء الخامس هو الجزء الأخير… الجزء الرابع كان هو الأخير مبدئيًا، لقينا الجمهور بيقول لي عايزين جزء خامس… وبعد الخامس الجمهور طالب بالسادس".
ويضيف أن الهدف من البداية كان مشروعًا مستلهمًا من أجواء “ألف ليلة وليلة”، قائلًا: "التارجت بتاعنا من الأول إننا بنحب ألف ليلة وليلة، فقلنا نعمل مشروع حقيقي بجد شبيه بألف ليلة ولييلة… لقينا الجمهور أصر فقلنا يلا جزء سادس ونكتبه أسطورة النهاية".
وعن احتمال جزء سابع، يوضح: "كل حاجة ليها نهاية… أتمنى طبعًا أعمل مداح أجزاء كتير وأشتغل عليه، رغم إن في ناس تقولك غير وجدد… أنا نفسي أجدد ونفسي أغير، بس هي genre جديدة ومختلفة طول الوقت… إنت مختلف عن زمايلك النجوم الكبار، في حتة لوحدك كده".
ويتابع: "مش مستني لحظة إن الناس تقول زهقنا… طول ما الورق والأفكار بتيجي حلوة بنقول ليه لأ؟ بس إحساسي إن ده ممكن نفصل بحاجة تانية إن شاء الله وبعد كده… وارد نرجع".
أحمد سمير فرج: :لازم بريك.. 180 حلقة رقم مهول"
بدوره، يؤكد المخرج أحمد سمير فرج أن الاستراحة ضرورية: "لازم نوقف سنة على الأقل عشان الأفكار… إحنا واصلين لسقف الأفكار، فلازم نفصل شوية عشان نقدر نكتب تاني. حتى لو هنرجع للمداح بعد سنة أو بعد اتنين وارد، بس أجزاء ورا بعض على طول صعب".
ويشير إلى أن 180 حلقة خلال 6 سنوات رقم ضخم، مضيفًا: "النوع ده من الدراما مستمر إلى الأبد… بس سابع وراه على طول لا أعتقد".
"أنا بعتبره بنبدأ المداح جزء أول"
رغم العودة من دون استراحة هذا العام، يؤكد حمادة أن الحماس سببه التغيير في صابر وحكايته: "اللي خلانا نتحمس إن صابر مختلف… مش مختلف كتمثيل، صابر كحكاية موجودة مختلفة عن اللي فات، حتى حكاية كل عيلته مختلفة عن اللي فات… المرة دي أنا بعتبره بنبدأ المداح جزء أول. كنت هسميه أسطورة البداية، والله كانت الفكرة دي موجودة، بس قلنا هنكتب أسطورة البداية وإحنا معلنين إنها النهاية؟"
أما أحمد سمير فرج فيعد الجمهور بمفاجآت: "كله جديد من أول حلقة… رحلة مختلفة تمامًا وتويستات جديدة خالص ما حدش متوقعها. أعتقد هيبقى في صدمة كبيرة في الحلقات الأولى، الجزء ده مبني بحنكة شديدة… شكل الصورة، أداء الممثلين، المواقع… الجزء السادس مختلف تمامًا عن كل الأجزاء".
"الثقة الزيادة بداية سقوط"
ورغم النجاح والترند السنوي، حمادة هلال لا يشعر بالاطمئنان الكامل، بل العكس تمامًا: "طول الوقت الواحد خايف وقلقان… كإنك امتحنت وذاكرت وبتستنى النتيجة. أملنا في ربنا كبير، بس حتة الثقة اللي أنا نازل بيها؟ لا ما عنديش دي خالص… ولو جت لي أخاف جدًا وأترعب وأعرف كويس إني هفشل. الثقة الزيادة دي أنا بعتبرها بداية سقوط".
ويكشف أيضًا عن فترة إرهاق خلال التصوير: "مع إني أخدت إجازة كنت قاعد في البيت متضايق جدًا… أحمد سمير قالي هتاخد إجازة تلات أيام، قلت له ليه؟ أنا عايز أخلص… قال لي لا، إنت هتقع مني ومش هنعرف نصور لا في رمضان ولا بعده. الحمد لله عدت، كان إجهاد بس مش أكتر".
ومن جهته، يوضح المخرج: "إحنا ورا الكاميرا حتى لو تعبانين مش مهم شكلنا إيه، بس الممثلين هم الواجهة الحقيقية… لما التعب يوصل لهم لازم نريحهم، لأن في النهاية بيهمني الأداء، ولو مفيش باور مش هقدر أطلب منه يطلع الجبل وينزل".
