كشف حازم إيهاب عن كواليس النجاح الكبير الذي حققه مسلسل الست موناليزا، مؤكدًا أن حجم التفاعل الجماهيري مع العمل كان استثنائيًا، لدرجة أنه شبّه الحالة التي صنعها المسلسل بما حدث سابقًا مع مسلسلي الأسطورة وجعفر العمدة.
وخلال لقائه مع ET بالعربي قال حازم إيهاب:“طبعًا الحمد لله دائمًا وأبدًا على كرم ربنا علينا، اللي عمرنا ما هنقدر نعدّه. اللي حصل الفترة اللي فاتت كانت طفرة كبيرة جدًا. إحنا بنقعد كتير جدًا لحد ما يبقى في مسلسل مفيش بيت في مصر مبيتفرجش عليه، من الناس اللي أصلًا مبتتفرجش على مسلسلات خالص، للناس اللي مهتمة بدراما رمضان”.
وأضاف:“أنا في وجهة نظري ده مبيحصلش غير في حاجات قليلة جدًا، أنا شخصيًا كحازم مشوفتهاش كتير. شوفتها في أعمال أخويا طبعًا محمد رمضان، ولما شفت مسلسلي الأسطورة وجعفر العمدة، وكمان مع أخويا الكبير المخرج محمد سامي، لأن معظم أعماله بيكون فيها الحالة دي”.
وأوضح أنه كان سعيدًا بردود فعل الجمهور منذ الحلقة الأولى، قائلًا:“اتبسّطت جدًا جدًا، وده كان من أول حلقة الحمد لله. آراء الناس على دوري كانت منقسمة لمرحلتين: مرحلة كانوا بيقولوا لي فيها (الله أكبر وحمد لله على السلامة)، وحسيت كأني جبت بطولة أفريقيا لمصر! والمرحلة التانية كانوا بيقولوا لي (حسبي الله ونعم الوكيل فيك)، لكن ده بالنسبة لي نوع من النجاح”.
وتابع:“أنا بحمد ربنا إني قدرت أوصل الدور زي ما كنت متخيله، وأخلي المشاهد يتفاعل معايا ويصدق إني فعلًا كنت جاي أغير حاجة في حياة الموناليزا، ولما حس بعد كده إني مطلعتش كده، حصل التفاعل ده”.
وعن سر اختياره لأدوار الشخصيات “التوكسيك”، أوضح حازم إيهاب:“في الأول والآخر الحمد لله ربنا رزقني بالدور، أنا مجريتش وراه، هو اللي جالي. ممكن صُنّاع العمل اختاروني لأني جاي من المنطقة دي في الأدوار، لكن الحقيقة إنه كان تحدي بالنسبة لي”.
واختتم حديثه بتوجيه التحية لـ أحمد مجدي، قائلًا:“كمتفرج شايف إن أحمد مجدي قدّم أكتر علاقة توكسيك السنة دي، وبوجه له الشكر والتحية، لأنه ممثل موهوب جدًا وشاطر جدًا”.
