كشفت شيرين عبد الوهاب تفاصيل أزمتها الأخيرة وكواليس عودتها للغناء، خلال مداخلة هاتفية مع عمرو أديب في برنامج "الحكاية" على قناة MBC مصر.
وقالت شيرين خلال المداخلة:"أنا الفترة اللي فاتت كنت تعبانة جدًا وحاسة إني بغرق، وكنت محتاجة أبعد شوية عشان أعرف أرجع تاني.. دلوقتي أنا كويسة جدًا نفسيًا وحاسة إني رجعت للحياة من جديد، أنا دلوقتي بغني للناس بروحي وقلبي، وعايزة صوتي يوصل لكل حد في بيته أو عربيته أو موبايله.. وحاسة بسعادة كبيرة برد فعل الناس".
وعن كواليس رجوعها للاستوديو، قالت:"أول ما دخلت كنت متوترة جدًا، قلبي كان بيدق بسرعة وإيدي كانت ساقعة، بس غمضت عيني وسجلت.. والحمد لله عرفت أرجع، وكل أسبوع تقريبًا هنزل أغنية لحد الصيف.. ووحشني الغنا جدًا، وفي دويتو مع محمد حماقي هيطلع قريب".
ووجهت رسالة دعم لهاني شاكر بعد أزمته الصحية، قالت فيها:"ألف سلامة عليك، ترجعلنا بالسلامة وبخير.. إن شاء الله كبوة وتعدي وربنا معاك".
كما حرصت على توجيه الشكر لكل الذين وقفوا إلى جانبها، وقالت:"زينة كانت بتراعي أولادي، وعزيز الشافعي كان سند كبير ليا، بييجي ياخدني من البيت ويرجعني.. ومحمود الليثي جابلي عفش عشان أفرش شقة، وأحمد سعد أخويا اللي أمي مجبتوش، وهيفاء وهبي كلمتني وسندتني، زينة كانت أكتر حد وقف جنبي، وعزيز الشافعي ودعوات الناس هما اللي وقفوني على رجلي".
وتابعت برسالة إنسانية:"لو تعرفوا قيمة السرير اللي بتناموا عليه، وإنك تصحى تلاقي باب أوضتك مقفول عليك وأنت في أمان، أو تسمع صوت عربية في الشارع، أو حتى عربية فول قدامك.. كل دي نعم إحنا مش حاسين بيها".
وكشفت شيرين أيضاً عن فترة علاجها، قائلة:"أنا كنت في مكان بعيد شوية بحاول أبعد عن أي ضغط أو أخبار، وبتعالج من اللي كان تعبني.. وحاسة إني اتولدت من جديد".
وفي نفس السياق، دخل محمود الليثي في مداخلة مع عمرو أديب، وأكد دعمه الكامل لشيرين، وقال:"أنا بحب شيرين جدًا، وعلاقتنا بقالها سنين طويلة.. وأنا حاطط عمري ومستقبلي كله تحت أمرها، ومش هتأخر عنها في أي وقت".
