تعرض فيلم "أسد" لهجوم كبير الأيام الماضية، واتهمه العديد بأنه يدعم "الافروسنترك"، وعلق محمد دياب وقال: "افروسنتريك معناها ادعاء ان المصريين اللي في مصر حاليا غزاه و الحضاره المصريه اصلها افريقي بناها الافارقه، و ده كلام فارغ طبعاً".
وأضاف: "أي شخص اتفرج علي فيلم أسد شاف ان اول مشهد في الفيلم العبيد اللي في الفيلم بيتخطفوا من افريقيا علي يد قراصنه انجليز و بعدها بيتباعوا في مصر. يعني العبيد اللي في الفيلم مش من اصل مصري و ده بينسف الاتهام الباطل ده في اول مشهد في الفيلم! ده بالعكس ضده، شخصياً عندي فيلم فرعوني شغال عليه و اعلنت عنه قبل كده بيكشف وهم فكره الافروسنتريك تماماً، و دي قضيه مهمه فعلاً، بس بستأذن كل الوطنيين اللي خايفين علي مصر من اي مؤامرات ممكن نتأكد قبل ما تتهموا ناس في صفكوا؟".
وأكمل دياب حديثه كاتبا: "صناع فيلم أسد مصريين ناس وطنيين عملوا الفيلم بتفاني و اشتغلوا عليه ٣ سنين و صوروه بالكامل في مصر بإيادي مصريه و قدموا منتج بشهاده الجميع يساوي الاعمال العالميه في الجوده، محتاجين دعمكوا عشان السينما المصريه صناعه وطنيه ناجحه، تأثيرها مش مادي فقط بل هي قوه ناعمه مهمه لنشر الثقافه و الوعي المصري".
واختتم حديثه كاتبا: "الكلام اللي كانت بتتناقله الصحافه عن ان الفيلم عن ثوره الزنج في العصر العباسي عاري من الصحه و عمره ما خرج من حد من صناع الفيلم. أسد بيتكلم عن منتصف القرن التاسع عشر لما مصر كانت أول دوله في المنطقه تلغي العبوديه و ازاي القرار ده في وقتها عمل زلزال اجتماعي، بدعوكوا كلكوا تتفرجوا علي الفيلم و طبعا النقد مرحب بيه، بس بستأذنكوا يكون نقد لحاجات موجوده في الفيلم".
واقترب فيلم أسد من تحقيق 13 مليون جنيه، خلال 3 أيام عرض، واحتفل اليوم محمد رمضان بالعرض الخاص للفيلم مع الجمهور السعودي، وفيلم أسد من بطولة محمد رمضان، رزان جمال، علي قاسم، أحمد داش.
