بعد ليلة استثنائية عاشها على مسرح مهرجان جرش، التي وصفها بأنها واحدة من أحلامه، التقى أحمد سعد بـ ET بالعربي، وتحدث عن كواليس الحفل، وسر القرارات العفوية التي يتخذها في حياته، كما كشف لأول مرة سبب رفضه دخول ابنته جودي عالم الغناء طوال 15 عامًا، قبل أن يقتنع في النهاية.
حلم تحقق.. أحمد سعد يتحدث عن ليلة جرش
وقال أحمد سعد لـ ET بالعربي إن الغناء في مهرجان جرش كان حلمًا بالنسبة له، مضيفًا: "حلم من أحلام حياتي بيتحقق النهارده، حاسس إن أنا عملت خطوة من الخطوات اللي كنت بحلم بيها وأنا صغير، ومن العلامات اللي لما تحصل أحس إن أنا كده نجحت، فجرش من الأحلام المهمة في حياتي".
رسالة خاصة من أحمد سعد إلى الجمهور الأردني
ولم يُخفِ سعادته بالتفاعل الكبير من الجمهور الأردني، وقال: "بالنسبة للجمهور الأردني بقى ده أنا بحبه... بحبه وأنا في الحفلة، وبحبه وأنا في الشارع، لما واحد يقول ازيك سيدي... يا سلام على الدلع واللزازة. ناس جميلة وطيبين، لسانهم حلو وذوقهم حلو وأكلهم حلو قوي، وهم ما يستاهلوش مني غير إني أجي أبسطهم وأدلعهم ويفرفشهم".
أحمد سعد: لو فكرت دقيقتين قبل أي قرار مش هعمله
ومع تصدر رقصاته وعفويته الترند، كشف أحمد سعد عن طريقته في اتخاذ قراراته، وقال: "والله والله أنا لو درست دقيقتين أي حاجة بعملها مش هعملها... أنا الفوضى الخلاقة. في حاجات ببقى عايز أعملها عشان أنا عايز أعملها، ولو كنت رجعت نفسي أو سألت ناس أو سألت نفسي مرة تانية ما كنتش عملتها".
وأضاف: "ممكن بعد ما أعملها والناس ما تحبهاش أطلع أعتذر، وأنا في النص ببقى عايز أعتذر برضه، لكن الحاجة الوحيدة اللي عمري ما هخسرها إني لما أغلط هطلع أقول إني غلط، لأن مفيش بني آدم على وجه الأرض ما بيغلطش".
أحمد سعد يكشف سبب موافقته على دخول جودي عالم الغناء
وتحدث أحمد سعد أيضًا عن مشاركة ابنته جودي في أغنية "كده كده"، مؤكدًا أنه حاول إبعادها عن المجال الفني لسنوات طويلة، لكنه لم ينجح في ذلك.
أحمد سعد يتحدث عن ابنته جودي
وقال: "جودي صح... كلمتها ما بتنزلش الأرض، وجودي حكمت عليا بصراحة، لأني ما كنتش موافق على الموضوع، مش عشان مش بحب الفن، لكن كنت عايزها تبقى طبيعية، بتروح الشغل الصبح وترجع الضهر، لأن إحنا عايشين طول الوقت في منافسة وضغط، والناس بتشوف الجانب الحلو بس، لكن لو ما نجحتش مش هتشوف ده".
واختتم حديثه قائلًا: "كنت عايز أعفيها من كل ده، لكن قعدت 15 سنة أحارب في الموضوع وما نجحتش... وهي مشيت كلامها عليّ".
