من جملة عفوية خلال حديثها مع معتز الدمرداش، إلى تريند انتشر بشكل كبير على السوشيال ميديا، تحولت عبارة إلهام شاهين الساحل يجنن يا معتز إلى واحدة من أشهر جمل صيف 2026، بعدما تداولها الجمهور بشكل واسع وبدأ عدد من المشاهير في التعليق عليها.
وقالت إلهام شاهين وعدد من الفنانين لـ ET بالعربي رأيهم في التريند، وكشفوا عن موقفهم من العبارة التي شغلت مواقع التواصل الاجتماعي.
إلهام شاهين: مش مصدقة اللي حصل
وقالت إلهام شاهين لـ ET بالعربي: والله ما عارفة ده حصل إزاي أصلاً، هو معتز كان بيقولي تعالي انزلي القاهرة عشان نصور البرنامج، فأنا عمالة أجل، فقالي إيه الحكاية؟ قولتله الساحل أجواء متتسبش يا معتز، متوقعتش خالص إنه يعمل اللي عمله.
وأضافت: 500 تيك توك، أنا مش مصدقة لحد دلوقتي، لأني دي جملة عادية أوي، والناس لما بتشوفني بتقولي من أول يوليو لغاية سبتمبر، وبيقولوها بدلع، بقولهم هو أنا قولتها بدلع كده؟
إلهام شاهين: مفيش بحر في الدنيا بلون البحر اللي عندنا
وتابعت إلهام شاهين حديثها عن حبها للساحل قائلة: مفيش بحر في الدنيا بلون البحر اللي عندنا، بحر جميل ورملة بيضا ونضيفة، في بلاد كبيرة بس البحر عندهم زلط ورجلين تتعور، إحنا عندنا في الساحل أحلى شواطئ وأحلى لون بحر في الكون.
أسماء إبراهيم: كنت عايزة أعمل التريند
وقالت أسماء إبراهيم لـ ET بالعربي: إلهام شاهين بتقولها جميلة وطريقتها حلوة، هي فيها أنوثة.
وأضافت: هي بتكلم كذا مرة كنت عايزة أعمل التريند ده على تيك توك وأرجع أقول هظبطه ولا لأ.
ميريهان حسين: من أول يوليو لأكتوبر
وعلقت ميريهان حسين على التريند قائلة لـ ET بالعربي: بالنسبالي من أول يوليو لأكتوبر أجواء تجنن يا معتز.
نرمين الفقي: كلنا زي إلهام
وقالت نرمين الفقي لـ ET بالعربي: إحنا كلنا زي إلهام، لأن كلنا بنعشق الساحل.
لجين عمران: إلهام عندها حق
أما لجين عمران فقالت لـ ET بالعربي: إلهام عندها حق، أجواء الساحل تجنن.
وهكذا تحولت جملة إلهام شاهين العفوية إلى تريند واسع، بعدما لاقت تفاعلًا كبيرًا من الجمهور والفنانين، الذين أعادوا تداولها بطريقتهم الخاصة.
