كشف مدحت العدل تفاصيل التحضيرات لمسرحية حليم، مؤكدًا أن فكرة تقديم العمل جاءت استجابة لطلبات الجمهور بعد نجاح مسرحية أم كلثوم، وذلك خلال لقائه مع ET بالعربي على هامش الإعلان عن تفاصيل المسرحية.
وقال مدحت العدل: أنا رفيق ET بالعربي للأبد، موضحًا أن فكرة تقديم مسرحية عن عبدالحليم حافظ لم تكن ضمن خططه في البداية، لكنه قرر تنفيذها بعد ردود فعل الجمهور عقب عرض أم كلثوم، قائلًا: لم يكن في ذهني إني أعمل مسرحية بعد أم كلثوم، إنما أنا عملتها بناء على طلب الناس، لما خرجت من عرض أم كلثوم لقيت كل الناس بتقول هتعملها أمتى لحليم.
وأضاف أن اختيار عبدالحليم حافظ جاء بالتزامن مع مرور 50 عامًا على رحيله، إلى جانب استمرار أغانيه في تحقيق أعلى أداء علني للمؤلفين والملحنين، بحكم رئاسته لجمعية المؤلفين، مؤكدًا أن نجاح تجربة أم كلثوم كان من أبرز الأسباب التي شجعته على خوض التجربة الجديدة.
وتابع مدحت العدل: بشكر الجمهور المصري والعربي، لسه جاي من جرش مش هتتخيلوا شكل الجمهور عامل إزاي.
مدحت العدل: زمن عبدالحليم حافظ هو زمن الرومانسية
وتحدث مدحت العدل عن شخصية عبدالحليم حافظ وأهمية تقديم تجربته على المسرح، قائلًا: عبدالحليم أي غنوة عملها لو تشوف كم المجهود والتعب عشان الأغنية دي تطلع للناس، كل غنوة من دول كانت بتاخد وقتها.
وأضاف: الرومانسية تعني المشاعر، عبدالحليم صوت مشاعرك بيغني للكل، ده المنديل الحرير والجوابات المكتوبة، ده اللي مفيهوش زحمة وضجيج، زمن حليم هو زمن الرومانسية.
مدحت العدل: مفيش حد نسخة من عبدالحليم
وأكد مدحت العدل أن تقديم عبدالحليم حافظ لا يعني البحث عن شخص يكون نسخة منه، موضحًا: مفيش حد نسخة من عبدالحليم، كل واحد ليه طبعه وشكله والزمن مختلف.
وأضاف: لو عبدالحليم كان موجود دلوقتي مكناش هنعرف هو هيبقى إيه، لإن عبدالحليم نفسه لما طلع كان لوحده، لا عمره قال أنا شبه حد ولا اتكلم ولا شبه نفسه بعبدالوهاب، بالعكس عمل أغاني مختلفة، فالجيل دلوقتي بيغني حسب العصر بتاعهم.
مدحت العدل يكشف تفاصيل اختيار بطل مسرحية حليم
وعن اختيار بطل المسرحية، أوضح مدحت العدل أن فريق العمل سيجري أوديشن لاختيار الأنسب لتجسيد شخصية عبدالحليم، قائلًا: هنعمل أوديشن وهنهتم بروحه مش قد شكله، لازم صوته حلو أوي، فلسه هنعمل أوديشن.
وأضاف أنه في حال تقديم مسلسل عن عبدالحليم حافظ، سيحرص أيضًا على اختيار وجه جديد، موضحًا: حليم لون واحد، زي ما أنا عملت مع أم كلثوم، حليم اسمه على الأفيش لوحده نجم.
مدحت العدل عن تقديم أبناء الفنانين لأعمال آبائهم
وتطرق مدحت العدل إلى إمكانية تقديم أبناء الفنانين لشخصيات آبائهم، مؤكدًا أن الجمهور هو صاحب القرار في النهاية، قائلًا: طبيعي أن الفنان يقدم ابنه، فالجمهور هو اللي بيحكم ويقول هل ابن فلان جدير إنه يطلع على المسرح وياخد نفس شهرة أبوه.
وأضاف: أنا مقدر عاطفة الأبوة إنك نفسك تقدم ابنك، بس أنا مقدر مهما قدمت وهو معندوش كاريزما الجمهور هو اللي بيحكم، الموهوب موهوب واللي مش موهوب محدش هيشوفه، عندنا ولاد فنانين زي كريم محمود عبدالعزيز، الجمهور بيحكم.
مدحت العدل: مسرحية حليم صعبة ومخلص النص من 8 شهور
وأكد مدحت العدل أن تقديم قصة عبدالحليم حافظ على المسرح يمثل تحديًا كبيرًا، قائلًا: عبدالحليم صعب أوي ساعتين، وعايزين نقدمه مختلف عن أم كلثوم ونعمل حاجات مدهشة ومختلفة، لافتًا إلى أنه انتهى من كتابة النص منذ 7 أو 8 أشهر.
أحمد فؤاد: حليم من أهراماتنا وهنقدمه بفكر جديد
من جانبه، تحدث المخرج أحمد فؤاد عن التعاون مع العدل جروب، مؤكدًا أن مسرحية حليم تأتي بعد نجاح تجربة أم كلثوم، قائلًا: ده تاني تعاون مع العدل جروب بعد أم كلثوم، وبعد سنة من العرض والنجاح اللي قعد 40 ليلة في القاهرة حبينا نستثمر التعاون ده في مسرحية حليم اللي الناس كلها كانت بتطلبها مننا.
وأضاف: زي ما بقول دايمًا إحنا عندنا أهرامات، الأهرامات دي لازم نقدمها بفكر جديد.
وأشار أحمد فؤاد إلى أن عبدالحليم حافظ يمثل حالة خاصة من الرومانسية، قائلًا: دكتور مدحت هو اللي قال آخر زمن الرومانسية على حليم، حالة الرومانسية كانت مسيطرة في الوقت ده، إحنا بنعمل حاجة بعد 50 سنة من وفاته، هو عايش في وسطنا لحد اللحظة دي وكلنا عندنا نفس الاهتمام والشغف تجاهه.
وتابع: مفيش نجم أكبر من اسم عبدالحليم حافظ، وهنشتغل على فكرة تقديم جيل جديد، إحنا قدمنا جيل كامل في أم كلثوم وهنشتغل على ده في مسرحية حليم، مصر ولادة وفيها مواهب كبيرة نقدر نقدمها.
آية العدل: عايزين نعلي على مسرحية أم كلثوم
وقالت آية العدل إن مسرحية حليم تمثل تحديًا جديدًا للشركة بعد نجاح مسرحية أم كلثوم، موضحة: المسرحية إنتاج ضخم ومتحمسين ليها بعد مسرحية أم كلثوم، وفيها تحديات كتير، إحنا عايزين نعلي على مسرحية أم كلثوم.
وأضافت أن عبدالحليم حافظ يختلف عن أم كلثوم من حيث ارتباط الجمهور به بصريًا وسمعيًا، قائلة: عبدالحليم كان بوب أكتر مرتبط في ذهن الناس صورة وصوت، مش مجرد صوت، أم كلثوم كانوا بيسمعوها أكتر ما بيشوفوها.
وتابعت: دكتور مدحت العدل بيعمل انفرادات وحاجات مش موجودة في السوق، لما قولنا نعمل مسرحية عن أم كلثوم الناس كانت بتقول ليه، الشطارة كانت إزاي تحول المشاريع دي لحاجة مربحة، دي شطارته إنه يعرف يبيع ويستعرض حاجة زي كده.
وأكدت آية العدل اهتمام العدل جروب باكتشاف المواهب الجديدة، قائلة: إحنا كشركة بنحب نطلع مواهب جديدة وبنعمل كده كشركة من 30 سنة، لافتة إلى أن الشركة تواصلت مع أحد أفراد أسرة عبدالحليم حافظ قبل التحضير للمشروع، وأن العمل على مسرحية حليم سيستغرق نحو 6 أشهر.
