خلال لقاءنا مع أنس طيارة في Milano Fashion Week، تحدث عن الأجواء التي يعيشها هناك، وعن إطلالته المختلفة. وعن الأجواء، قال أنس: “يعني أجواء حلوة لطيفة مثل ما قلت لك، أول مرة بتصير، فيعني عم نعيش وننبسط بس”.
وعلّقت الزميلة كارلا عبد الملك: “حبيت اللوك اليوم هيك مختلف”، ليرد أنس: “غير شوي، إيه صحيح”، وأضافت: “هيك والآيتيود كمان غير”، ليجيب: “إجباري بينعكس لأنه”.
أنس طيارة: كنا مراهنين على هالقصة
وبالحديث عن أصداء مسلسل "حب ع ورق”، سألته كارلا: “ما معقول يعني ما قابلك وما أحكيك عن أصداء حب ع ورق، صراحة مكسر الدنيا، إنت كيف ملاقي الفيدباك؟” فقال أنس: “الحمد لله الفيدباك منيح، كلياتنا شباب عنا طاقة ووصلت لهالجمهور، وهذا الشيء منيح من ناحية إنه الكل أخذ فرصة، والكل وكنا يعني كنا مراهنين على هالقصة بصراحة”.
وتابع: “نحن تعبنا فيه للأمانة، إن كان أنا ولا هي ولا كل الممثلين، واشتغلناه بضمير وحاولنا نطلع أحسن صورة. كان معنا مخرج ظريف وكاس، ونحن على علاقة لسه حتى مع الأشخاص اللي أنا دائماً بحب أقول إنه الناس اللي وراء الكاميرا بحب أشكرهم، لأنه هم كمان تعبوا مثلنا وأكثر حتى، فالحمد لله النتيجة وصلت يعني للناس”.
أنس طيارة: المشاهد كانت ضرورة درامية
وعن المشاهد التي تضمنت جرأة، سألته كارلا: “في مشاهد كان فيها شوية جرأة، كان في بوسة، كان في هيك مشاهد، شو تعليقك على هول المشاهد؟ لأنه الناس هيك كانت عم تحكي على هيدا، هول المشاهد”.
فأجاب أنس: “أول شيء بوس ما صار، يعني كان في تكنيك معين بالكاميرات. الشغلة الثانية هي المشاهد كانت ضرورة درامية، وكنا يعني بعرف، يعني نحن زملاء بنعرف نتعامل معها منيح”.
أنس طيارة عن الحلقات المقبلة من مسلسل حب ع ورق
ومع استمرار عرض المسلسل وبقاء حلقات حتى الوصول إلى الحلقة 90، سألته كارلا: “النهاية، لأنه بعد في يعني تقريباً 18 حلقة، بعد فيه للـ90، شو بتقدري تقول للمشاهدين شو حيَشوفوا؟”
فقال أنس: “حيحلى المسلسل أكثر من الأول بكثير بآخر عشر حلقات”.
