من مبدأ حق الرد على تصريحات الناقد طارق الشناوي عن فيلم ريستارت في ET بالعربي والتي قال فيها: "أنا محستش إن سارة وفيق أضافت حاجة في الفيلم لو شيلنا اسمها وحطينا إخراج تامر حسني مش هنحس بالفرق لأن هي مش بتستخدم أدوات المخرج إحنا شايفين حوارات كوميدية فيها مبالغات واستظراف والمخرجة سايبة الممثلين".
شاهدوا التقرير: ريستارت يثير علامات استفهام عند الناقد طارق الشناوي
وردت سارة وفيق من خلال بوست كتبته على صفحتها على الفيسبوك قالت به: "استاذ طارق الشناوي في فرق كبير بين الاهانه وبين النقد حضرتك بتقول ان مفيش موضوع في الفيلم ودي حاجه ضحكتني جدا لان احنا بنتكلم عن موضوع الساعه موضوع العصر اكبر موضوع بيهمنا ويخصنا حاليا".
وأضافت: "كلامك فكرني بمشهد في الفيلم للفنان محمد ثروت وهوه بيقول انا أعمل اي حاجه عشان ابقي تريند ( احنا خدامين التريند ) وسمع كلام الجوكر ( الفنان باسم سمره ) اللي بيشتغل لاغراض ناس ،،، مبروك يا استاذ طارق عرفت تبقي تريند من غير ما تنقد الفيلم .. تخبط في القائمين على العمل بعيد عن العمل نفسه ولا اتكلمت عن إيجابياته ولا سلبياته".
وأكملت: "لا ههاجم اشخاص وبكده هطلع تريند بسرعه ده موضوع الفيلم اللي انت مافهمتوش أصلا ولا هو جالك ع الجرح ؟ وعلى فكره انا كمان بعرف اعمل تريند و هنطلع تريند انا وانت ،، بس أنا علي حق وهمنشنك عشان تظهر بسرعة انت بتقول ان اغنية المقص عجبتك بس هي مش داخل الفيلم لا يا استاذ طارق الاغنيه في الفيلم بس شكل اللي بيمليك اتلخبط ، ادخل شوف الفيلم اللي انت مشوفتوش و احكم عليه بنفسك وبلاش الأفكار السطحيه اللي بتقولها علي كل الأفلام لانك لو شوفت ريستارت فعلاً كنت هتعرف ان قصته اهم ما فيه".
وختمت سارة حديثها قائلة: "وبعدين حضرتك بتتكلم عن أدوات المخرج والمؤلف ولم تستخدم أدواتك كناقد فني ياريتك قولت حاجه نستفيد بيها بدال مانت طالع ترمي افيهات و افيهات وحشه كمان الرقم اللي متحقق جوه مصر و برا مش مجامله يا استاذ طارق ده الجمهور الحقيقي اللي بنخاطبه دول مش ولاد اختي مثلاً الفيلم لسه نازل وداخل علي خمسين مليون داخل مصر فقط ودا نجاح مفرح كل صناعه الحمد لله على العموم دي كلمتك ورأيك و الجمهور قال كلمته برضو".
يذكر أن فيلم "ريستارت" بطولة تامر حسني، باسم سمرة، محمد ثروت، هنا الزاهد ومن تأليف أيمن بهجت قمر وإخراج سارة وفيق.
