بالرغم من مرور أيام على حفل إفتتاح مهرجان أيام قرطاج السينمائية في تونس إلا أنه تصدر الترند من جديد، وذلك بالتزامن مع تداول فيديو لنيللي كريم وزوجها هشام عاشور عند خروجهم من القاعة بعد تكريمها .
ويظهر في الفيديو هشام عاشور ،زوج نيللي كريم ، وهو يمنع المعجبين من إلتقاط الصور معها.
ومع إنتشار هذا الفيديو بدأ البعض بتوجيه الانتقادات لنيللي كريم وإتهامها بالغرور لتجاهلها الجمهور ، بالإضافة إلى عدم إجراء اللقاءات الصحفية أو ندوة صحفية بعد التكريم.
نيللي كريم ترد على الإنتقادات
نيللي كريم بدورها ردت على هذا الهجوم في مداخلة هاتفية مع الإعلامي شريف عامر ببرنامج "يحدث في مصر" وقالت "أنا عمالة أسمع الأخبار وأقرأ حاجات ومدير المهرجان أستاذ رضا الباهي قال كلام فأنا كنت عمالة أسمع وأقول حاجات وبصراحة لاقيت كل الصحفيين بيكلموني أنت مش هتردي مش هتتكلمي رد فعلك ايه فبعد ما فات أكتر من أسبوع من المهرجان أستاذ رضا قال أن أنا جيت وسافرت فجأة ومحضرتش ندوة التكريم".
وأضافت نيللي كريم: "أنا لما كلموني علشان أجى مهرجان قرطاج ومشكورين أتكرم وكان شرف ليا أني أبقى موجودة في قرطاج وأتكرم وأنا بحب كتير الشعب التونسي وكان آخر نجم أتكرم كان نجمنا الكبير أستاذ عادل إمام وإني أتكرم ده شرف بس أنا كنت قولتله أني هاجي 24 ساعة بس لظروف التصوير فهل الكلام ده يناسبك فقالولي أه طبعا واللي حصل إني سافرت يوم 30 والمهرجان كان يوم 30 وسافرت 31 الصبح دي أول نقطة فمكانش في إتفاق لأى حاجة تانية".
وأكملت نيللي كريم حديثها رداً على بعض الاتهامات الموجهة لها عن تجاهلها الجمهور فقالت: "أنا متعودة في أى مهرجان بنروحوا فدايما بيبقي لما بتطلع على المسرح فالمهرجان بيقول للفنان تحب تقول كلمة فالفنان بيروح للميكروفون وبيقول كلمة، أنا الحقيقة قبل ما أطلع على المسرح كان قاعد جنبي الأستاذ طارق الشناوي وكنت لسه بقوله أنا عاوزة أقول كلمة وأشكر المهرجان ولسه بحضر الكلام لاقتهم ندهوا اسمي وكنت مستنية أنهم يقولولي فالحقيقة أنا شخص خجول وبحرج فاتكسفت أطلب وأستاذ صادق الصباح برضه مقالش كلمة".
نيللي كريم.. "مكانش معايا أمن وزوجي كان بيحميني"
وأنهت نيللي كريم الحديث عن الفيديو المنتشر لها مع زوجها هشام عاشور وهو يمنع الجمهور من التقاط الصور ويصرخ بـ: "أنا لما حد بيطلب أنه يتصور معايا عمري ما بقول لأ بس أنا لما خلص المهرجان حصل هجوم كبير عليا وكنت لابسة فستان طويل والناس داست على فستاني وفي حد زقني وإعتراض هشام علشان مكانش معايا أمن وكان في حالة هرجلة لدرجة أن فستاني إتقطع وفات كل ده وأنا متكلمتش".
