ET بالعربي التقى بـ علي صبحي، أحد أبطال مسلسل إخواتي، بعد النجاح الذي حققه العمل في موسم رمضان 2025، حيث تحدث عن تجربته مع الدور والتحديات التي واجهها.
وقال علي صبحي: “شخصية هشام كانت مفاجأة بالنسبة لي.. هو جوز سُهى، اللي بتجسدها النجمة نيللي كريم، وأقدر أقول إن المسلسل ده بالنسبة لي كان محطة مهمة من البداية. لما الأستاذ شاكر كلمني عن الدور، كنت حاسس إنه مغامرة، زي ما بتمضي على بياض! خاصة إنه أول مسلسل أظهر فيه بشكل كبير بعد مشاركتي في تحت الوصاية مع الأستاذ شاكر والنجمة منى زكي.”
وأضاف: “لما قرأت السيناريو، بصراحة اتخضيت، لأن الشخصية غير متوقعة تمامًا.. حسيت إنها تحدي كبير بالنسبة لي، وكنت بسأل نفسي: هل هقدر أقدم الدور ده ولا لأ؟ لكن الحمد لله الجمهور تفاعل بشكل رائع مع الشخصية.”
هل سيكون جزءًا من أولاد رزق 4؟
مع النجاح الكبير الذي حققه فيلم أولاد رزق 3، طرحنا عليه السؤال الذي يشغل بال الجمهور: هل سيكون جزءًا من الجزء الرابع؟
علي صبحي: “لغاية دلوقتي، مفيش معلومات واضحة عن اللي بيحصل، لكن أكيد أي حد يتمنى يكون جزء من عالم أولاد رزق.. الشغل مع طارق العريان تجربة عظيمة، وكمان كل النجوم اللي في الفيلم نجوم سوبر ستارز! فطبعًا، لو في جزء رابع وخامس وسادس وسابع.. أنا معاكم لحد ما الناس تقول كفاية!”
سيكو سيكو.. حب العمر!
وعن تجربته مع سيكو سيكو، علق بحماس شديد: “ده حب عمري! من أول ما الأستاذ محمد حلمي والأستاذ عمر مهندس كلموني عن التجربة، وأنا متحمس جدًا.. خاصة إن عصام وعالية من إخواتي، وأول ما قالوا لي إنهم عايزيني ضيف شرف، كان ردي: إنتوا بتهزروا؟ أنا معاكم رسمي!”
