خلال التحضيرات النهائية لمسلسل العتاولة 2، و قرب بداية تصويره، أعلن صناع العمل عن إنضمام فيفي عبده لأبطال المسلسل، الذي سيشارك في السباق الرمضاني 2025.
مما جعل فريدة سيف النصر توجه رسالة لـ فيفي عبده و لـ صناع المسلسل و كل أبطاله من خلال ET بالعربي، قالت فيها " أنا طبعاً عملت بوست أما عرفت عن إنضمام فيفي عبده للعتاولة 2، و طبعاً ده مسلسلي و ده نجاحه كان معايا و مع كل الموجودين طبعاً كلنا شركاء في النجاح، بما فيهم المخرج، الإنتاج و الفنانين".
وتابعت كلامها "و ده يعتبر إبن من أولادي، الحمد لله اللي كلهم ناجحين زي بدون ذكر أسماء. الأب الروحي، الفتوة، الرحايا، أوراق مصرية، و حاجات كتير مش هقدر أحدد الأدوار اللي أنا بحبها، لكن ده آخر العنقود، إبني الصغير اللي بحبه جداً، لكن حتى إبنك الصغير لو سافرتي أو بعدتي بتبقي عايزاه ينجح، و دايما تتابعي عامل إيه، أخبارك إيه".
"فـ طبعاً إنضمام فيفي عبده لهم ده إنجاز حلو أوي، أنا شخصياً بحبها، ست لذيذة و دمها خفيف، و إحنا طبعاً نكدنا على الناس كتير، قتل و دبح و سرقة، و موت مفاجئات زي وفاتي كدة، فـ فيفي هتعمل روح كدة فيها كوميديا فيها لذاذة".
أيضاً شاهد في تقرير سابق.. فريدة سيف النصر تودع موسى
و اختتمت كلامها قائلة "مبروك يا فوفة، و ميرسي جداً على مجاملتك ليا في فرح إبني و رقصك فيه، و كل اللي عملتيه، و ميرسي جداً لكل زمايلي، و أتمنى لهم النجاح، و على فكرة اللي بيتمنى الخير للناس ربنا بيديله زيه و أكثر، و الحمد لله على كل حال، و مبروك للجميع يا حبايب قلبي، ربنا يجعل وشك حلو عليهم، مبروك".
يذكر أن مسلسل العتاولة حقق نجاحاً كبيراً خلال عرضه في السباق الرمضاني 2024، مما شجع صناعه على وجود جزء ثاني، و سيشارك في بطولته أحمد السقا، طارق لطفي، زينة، باسم سمرة، و سيغيب عنه فريده سيف النصر و مي كساب.
