اتهم محمد رحيم صناع اعلان بنك القاهرة الذى شارك فى غنائه كل من محمد منير والشاب خالد وأمير عيد ومروان موسي، بسرقة لحنه من أغنية بعنوان "حليلي دنيايا" قدمها مع الشاب مامي وإليسا.
وكتب محمد رحيم على فيسبوك "وكالعاده وزي مانا متعود كل سنه الاقي في رمضان لحن من الحاني نازل في أحد الإعلانات او المسلسلات بدون استئذان أو تصريح مني أو من الشاعر والمرادي الضرر كبير جدا لأنه تم سرقه لحني ووضعه في واحد من أكبر الحملات الدعائيه اعلان".
وأصاف رحيم: "(بنك القاهره) واللى بيغنيه قطبين كبيرين من اقطاب الاغنيه العربيه الفنان محمد منير والشاب خالد والغريبه ان النحت والاستخفاف بحقوق المؤلف والملحن خلا القائمين على العمل يقنعوا الشاب خالد يغني جمله اللحن اللى كنت عاملها للمطرب الكبير المنافس له (الشاب مامي) من سنه 2007 يعني من 15 سنه بدون الرجوع ليا ولا لورثه الشاعر عبد العزيز عمار شاعر الاغنيه الاصليه الله يرحمه وازاي انتوا مستخفين بالقضاء والقوانين كده؟؟ وازاي انتوا ناس مجردين من المهنيه ومش بتحترموا ولا الجمهور ولا الزملاء ؟؟ وازاي انتوا بتسرقوا الأعمال في وضح النهار ليستفيد بنك من بنوك الدوله مستخفين بحكومه نفس الدوله وكأنكوا واثقين ان مفيش حد هيعملكوا حاجه ولا حد هيعاقب اللى سرق واعتدى والله العظيم حرام مجهود السنين يترمي على الارض كده قدام عنين الواحد وهو حي يرزق ايه الاستخفاف".
وأكمل حديثه في البوست المطول الذي شاركه فكتب "انا واثق في ربنا سبحانه وتعالى ثم في القضاء المصري انه هيرجعلي حقي وحق الشاعر المرحوم عبد العزيز عمار اللى بجد أولاده اولى بفلوس ابوهم اللى شوهتوا وحرفتوا كلمات أغنيته بعد ما رحل من 10سنين وزي ما اولاد كل حد فينا اولى بمجهود ابائهم اللى اجتهدوا وتعبوا علشان يعملوا أعمال ناجحه لسه بيتنحت فيها لحد النهارده من انصاف وارباع الموهوبين والمشكلة الأكبر ان الملكية الفكريه دي بتشارك في الدخل القومي في كل بلاد العالم وبتؤثر في اقصاديات الدول وكل العالم يعلم اهميه القوى الناعمه المصريه في شتى المجالات لكن للأسف فيه ناس لسه عايشه على سياسه القتل المعنوي والمادي للفنان والمبدع المصري حيا وميتا وبعدين لما بتعملوا كده في اعمالي وانا عضو محترف في جمعيه SACEM الفرنسيه ومعايا شهاده الاحتراف الدوليه وعضو عامل في جمعيه ساسيرو المصريه للمؤلفين والملحنين وعضو عامل في نقابه المهن الموسيقيه واعمالى واضحه واسمي معروف الحمد لله ومسيرتي 25 سنه اومال تعملوا ايه في الملحن والشاعر اللى لسه بيبتدي وبيقول يارب أكرمني !!!؟؟؟".
