تحدثت المخرجة نادين خان لـ ET بالعربي عن مسلسل بنج كلي، وكشفت تفاصيل التحضير للعمل والتحديات التي واجهت فريقه، إلى جانب ردها على بعض الانتقادات التي طالت المسلسل منذ بداية عرضه.
وأوضحت نادين أن العمليات والتفاصيل الطبية كانت من أصعب التحديات التي واجهتهم، قائلة: "أكتر حاجة واجهتنا صعبة في العمل هو العمليات والدقة الطبية اللي إحنا نحاول نوصل لها على قد ما نقدر، ده بالنسبة لنا كلنا مجال جديد، تفاصيله مختلفة خالص، والديناميكية بين الأطباء والشخصيات ده عالم كلنا أول مرة ندخله ونشوفه ونفهمه".
وتدور أحداث "بنج كلي" في عالم الأطباء والتخدير، من خلال قصة «دعاء»، التي تتحدى والدها بالالتحاق بإحدى المستشفيات للعمل كطبيبة تخدير، وتؤدي دورها سلمى أبو ضيف، قبل أن تتصاعد الأحداث عندما يكشف أحد المرضى سرًا خطيرًا بعد إفاقة من التخدير الكلي.
نادين خان عن اختيار سلمى أبو ضيف
وعن تحضير سلمى أبو ضيف للدور، قالت نادين: "سلمى ممثلة موهوبة ومحترفة، فاشتغلت كتير قبل تصوير، وحضرت في مستشفى مع طبيب تخدير عرفنا التفاصيل، اتكلمت مع دكتورة دعاء جلال كتير، كان في بحث عملناه من ناحيتها ومن ناحيتنا قد ما هي تقدر تؤدي الدور كده".
وأشارت نادين إلى أن اختيار سلمى لتقديم شخصية طبيبة التخدير جاء ضمن فكرة أساسية في العمل، موضحة أن المسلسل يتناول دخول امرأة إلى مجال يهيمن عليه الرجال، قائلة: "فكرة الست الجراحة أو دكتورة التخدير الست اللي بتخش عالم بيسيطر عليه الرجال وما بيقبلوش بدخول ستات فيه بسهولة خالص، هو ده أساس المسلسل، ده موجود على الورق أصلًا وطبعا إحنا طورناه واشتغلنا عليه أكتر".
نادين خان تفسر مشهد التصوير بالمقلوب
وردًا على الانتقادات التي طالت أحد المشاهد التي ظهرت بصورة مقلوبة، أوضحت نادين أن الفكرة جاءت من طبيعة رؤية المريض أثناء وجوده على سرير العمليات.
وقالت: "لما بتخش أوضة العمليات بعد الشر عن أي حد، لما بتبقى نايم على السرير إنت بتشوف دكتور التخدير بالشقلوب، فبدأت من هنا الفكرة. وكمان لما بتخش مستشفى، العالم بقسوتها ممكن حياتك تتشقلب في لحظة واحدة، فهي جت من هنا".
نادين خان تكشف حقيقة الاستعانة بدوبلير في مشهد حادث السيارة
وعن الانتقادات المتعلقة بالاستعانة بدوبلير رجل بدلًا من سلمى أبو ضيف في مشهد خبطة السيارة، أكدت نادين أن الدوبلير نفذ لحظة الاصطدام نفسها، بينما أدت سلمى مشهد الوقعة.
وقالت: "آه، الخبطة نفسها، الإمباكت نفسه كان دوبلير أيمن هو اللي عمله، لكن الوقعة هي سلمى اللي عملتها، الوقعة نفسها بكابلات وكده. ما خفتيش، ده حاجة طبيعية، ده جزء من الشغل، يعني بيبقى فيه دايمًا دوبلير في المشاهد الصعبة دي، بيبقى في دوبلير لأي ممثل".
