بعد أن أثارت صورها من كواليس حفل الزفاف في مسلسل “سلمى” تفاعلاً واسعاً عبر مواقع التواصل الاجتماعي، تحدثت نانسي خوري عن سبب نشرها لتلك اللقطات التي وصفتها بـ”اللحظات الممتعة والمليئة بالضحك”.
نانسي خوري تروي تفاصيل صور الزفاف في مسلسل “سلمى“
وفي تسجيل صوتي خاص لـET بالعربي، وجّهت نانسي رسالة لجمهورها قائلة: “لكل جمهور ET بالعربي ولكل متابعي مسلسل سلمى، معكن نانسي خوري، حابة قول شكراً كتير على متابعتكم للمسلسل، وعلى تعليقاتكم الحلوة دايماً، وشكراً لحماسكن وصبركن لحتى تعرفوا بالأخير شو بدو يصير”.
نانسي أضافت متحدثةً عن الحلقة التي تضمنت مشهد الزفاف فقالت : “حلقة العرس تبع هيفا كانت مهضومة كتير ومسلية وفيها مواقف كتير بتضحك مع هيام وباقي الشخصيات، وبالكواليس كنا كتير متسليين لأنو رايحين نصوّر مشاهد العرس، وكتير استمتعنا بالمكان وإنو مزحنا وضحكنا، وبما إنو المسلسل فيه جرعة من الحزن، فوقت يكون في هيك مشاهد نحنا كتير مننبسط”.
أما عن الفيديو الذي شاركته مع أحمد الذي يجسّد دور الطفل “شادي”، قالت نانسي: “متل ما شفتو، أحمد لي عم يعمل دور شادي، كنا أنا وياه عم نلعب لعبة العروس والعريس، بما إنو هيفا بدها تتزوج سليم، وشادي مش رضيان، فقررنا نلعب هيدي اللعبة جوا بالكواليس وصورونا رفقاتنا، وأنا بالصدفة نزلت الفيديو لأن حبيتو من أول ما صورناه كتير حسيتو مهضوم، ونزلتو وعمل هادا التفاعل لي كتير كبير”.
وعن الصور التي تصدّرت مواقع التواصل، أوضحت نانسي خلفيتها بطرافة: “بما إنو عرس هيفا كذّابي فقلنا ليش ما نعمل فوتوسيشن لهيفا، وفعلاً كنا يومها مبسوطين كممثلين بالمكان وكلنا كنا لابسين حلو، فالكل تصوّر والكل نزّل صورو، فأنا حسيت لازم حط الصور وشارك العالم هيدي اللحظات الحلوة”.
ثم اختتمت حديثها برسالة محبة لجمهورها قائلة: “منحبكن كتير وخليكن عم تتابعونا، من كل قلبي غمرتوني بتعليقاتكن ورسائلكن، كل الحب لكل الجمهور الرائع وين ما كان بكل الوطن العربي”.
