تصدرت حلقة هنا الزاهد مع إسعاد يونس في برنامج صاحبة السعادة الترند، وذلك لحديثها عن كثير من الأشياء التي تخصها من الجانب الشخصي بالإضافة إلى الجانب العملي.
وكشفت هنا عن مواصفات فتى أحلامها وقالت: " فتى أحلامي لازم يكون راجل وسند وضهر ويعمل كل حاجة علشان يراضيني ويشجعني علشان أكبر لازم أحس بالأمان معاه، وأنا ما بتشدش للي في سني وبحب الأطفال وعشان كده نفسي في بنت وولد".
أما عن انفصالها عن أحمد فهمي فقالت هنا: " مكنتش متخيلة أن فيه حاجة اسمها طلاق بالنسبة ليا وربنا جايلي الموضوع بالتدريج في 8 شهور لأن أنا شخص روتيني وصعب أتخلى عن حاجة اتعودت عليها لكن الحمد لله أدركت أن ربنا كتب لي الخير في كل شيء وشايف أن حياتي أفضل بالانفصال، وده سبب أن منزلتش دمعة من عيني بعد انفصالي من أحمد فهمي".
كما تحدثت هنا عن أزمة والدتها الصحية وقالت: "ده الوقت اللي أنا حسيت أني اتكسرت جدًا وأنا كنت بصور ولقيت فرح بتكلمني بتقولي هنا الحقينا وماما كانت عاملة الأشعات وكنا مستنين النتيجة وطلع عندها المرض الخبيث وسمعت الخبر انهارت وكنت واقفة وقعدت مش عارفة أقف واللي مالوش خير في أهله مالوش خير في حد وأمي لما بروح شركات إنتاج بتبقى جمبي عشان تطمن عليا وبتبقى دايمًا معايا في كل حاجة في حياتي وهي الحمد لله أحسن بكتير دلوقتي والفترة دي احنا التلاتة اتدمرنا نفسيًا ودايمًا بدعي وبخاف أوي من فكرة أن في أي يوم يحصل أي حاجة والله مش عارفة هيجرالي ايه".
