مفاجأة غير متوقعة قدّمتها اليوم نادين نجيم إلى جمهورها، بعد ظهورها عبر سناب شات بجاكيت أصفر تعود ملكيّته إلى مايكل جاكسون.
نادين نجيم عن مايكل جاكسون : "كان الـIdol تبعي"
نادين تحدثت لجمهورها وهي تستعرض الجاكيت فقالت : "بدي قلكم شغلة قبل ما إنهار وإغمى عن الوعي وتخسروني، اليوم هو أسعد نهار بحياتي وما رح تعرفوا ليش، بس هلأ بعد شوي رح تعرفوا".
تابعت : "لا أعصابي حاملتني ولا عقلي عم يستوعب شو عم بيصير، يمكن سفرتي زبطت من ورا هاللحظة لي أنا واقفة عم صوّر فيها لخبركم أحلى شي صار بحياتي".
وقالت : "رح فرجيكم هيدي الصورة، هيدا مايكل جاكسون، شو لابس ؟؟ تفضلوا شو إجاني مُفاجأة اليوم، شخص قريب منو كتير، كنا عم نحكي أنا ياه وخبرتوا أديش أنا بحبو لمايكل جاكسون وأديش بيعنيلي وأديش أنا زعلت وقت لي توفى وأديش أنا كنت ناطرة لروح إحضر الحفلة تبعو، لما كنت بعدني بالجامعة ومحمّسة، وبالنسبة إلي هو أسطورة ما بقى تتكرر".
ثم أكملت نادين شرحها عن الجاكيت لتقول : "حبّ يفاجئني بالجاكيت الأصلية لمايكل جاكسون لي لبسها لـ مجلة إيبوني، فهيدي الجاكيت لمايكل، لابستها انا هلأ، وأنا مبسوطة إنو القياس تبعو طلع متل القياس تبعي، أنا كتير محظوظة، أنا أسعد مخلوقة على وج الأرض، عم حاول شم ريحتها ما عم تزبط".
وختمت الفيديو قائلة : "هيدي جاكيت كتير مميزة، كلها حرير"، قبل أن تقوم باستعراضها للجمهور أمام المرآة وتقول : "أديش مهضومة ؟؟ لابقتلي صح ؟؟ يا ريت فيني خلّيها، كل الوقت حاضنتها".
