مع اقتراب موعد طرحه، كشف أمير محروس تفاصيل التحضيرات لألبوم عمرو دياب الجديد "حبيتِك"، مؤكدًا أن العمل على الألبوم بدأ منذ نحو 6 أشهر، وأن الهضبة يتعامل مع كل ألبوم وكأنه أول ألبوم في مسيرته.
وقال أمير محروس، لـ ET بالعربي، إن عمرو دياب يمر بمرحلة طويلة من اختيار الأغاني قبل الاستقرار على القائمة النهائية، موضحًا: "بقالنا 6 شهور شغالين في الألبوم الجديد، والهضبة في كل ألبوم بيعمل عدد أغاني كبير جدًا، وبعدها يقعد يختار أحسن ما فيهم، واللي شايف إنه لايق عليه وعلى جمهوره. هو عارف كويس جدًا صوته حلو فين، وإيه الأغنية اللي هيقابل بيها جمهوره في الحفلات".
وأضاف: "إحنا ممكن نوصل لـ36 أغنية متنفذ ليها كل المراحل، حتى الميكس والماستر، وفي الآخر يصفيهم لـ12 أغنية بس هما اللي ينزلوا للجمهور. حتى ألبوم (ابتدينا) كان في البداية حوالي 28 أغنية معمول لها كل حاجة، لأنه كل سنة بيعتبر نفسه إنه بيبدأ من جديد."
وتحدث محروس عن شغف عمرو دياب، مؤكدًا أنه السبب الرئيسي في استمراره على القمة، وقال: "الشغف اللي عند عمرو دياب مش طبيعي، والإصرار اللي جواه إنه يتفوق على نفسه كل سنة حاجة مبهرة. بالرغم من التاريخ الكبير اللي عمله، لكنه كل سنة عنده نفس الحماس، وبيبذل مجهود جبار، وكمان بيجبر كل اللي شغالين معاه يتعبوا ويشتغلوا بنفس الشغف، بسبب حبه للشغل والأفكار اللي بيقدمها."
وكشف أيضًا كواليس أغنية "خطفوني" من ألبوم "ابتدينا"، قائلًا: "الألبوم كان فيه 15 أغنية، وأغنية (خطفوني) اتعملت واتهدت أكتر من 4 مرات، حتى عمرو مصطفى اتفاجئ. عمرو دياب بنفسه كان صاحب فكرة مشاركة جنا بنته في الأغنية، وكمان هو اللي اقترح إنها تغني بالإنجليزي مش بالعربي، وفكرة وجود الرابر كانت فكرته برضه."
وعن الألبوم الجديد، أكد محروس أن الهضبة لا يزال يحتفظ بنفس الرغبة في النجاح، مضيفًا: "هو لا بيكل ولا بيمل إنه يفضل ناجح ومتصدر، والشغف ده أنا مشوفتوش في حد تاني. ربنا يحفظه ويديله الصحة، وإن شاء الله ألبوم (حبيتك) يكسر الدنيا. المرة دي فيه غُنا بجد وسلطنة، وفيه مواضيع مختارة على الفرازة، وإن شاء الله يحقق نجاح كبير زي كل سنة."
وأشار إلى أن الألبوم يشهد تعاونات جديدة، موضحًا: "معانا مجموعة كبيرة جدًا من الشعراء والملحنين، وفيه مفاجآت كتير وناس جديدة خالص. إحنا دلوقتي بنحط اللمسات الأخيرة، وإن شاء الله الجمهور يفرح بيه."
واختتم حديثه برسالة إلى عمرو دياب، قائلًا: "الصيف مبيحلاش ولا بيطل علينا والفرحة والبهجة غير بصوت الهضبة. هو دايمًا البوصلة الفنية، والناس بتشوفه وتقلده، وموضة الهضبة مش من فراغ."
كما استعاد محروس رحلته الطويلة مع عمرو دياب، مشيرًا إلى أن تعاونهما بدأ منذ عام 1999 مع ألبوم "قمرين"، ثم تواصل في ألبومات "تملي معاك"، و"حبيبي ولا على باله"، و"يا أنا يا لأ"، و"مكانك"، و"ابتدينا"، وصولًا إلى "حبيتك". وأضاف أنهما قدما أيضًا عددًا من الأغاني المنفردة الناجحة، من بينها "أنت الحظ"، و"بطمن عليك"، و"ب ح ب ك"، و"يا ليل" بمشاركة ابنه عبد الله دياب، إلى جانب أغنيات الحملات الرمضانية "أكتر وأكتر"، و"نقصاك القعدة"، و"الكلمة الحلوة"، و"حكايتنا الحلوة"، مؤكدًا أن رحلتهما الفنية الممتدة لأكثر من 25 عامًا شهدت العديد من النجاحات.
