رغم النجاحات الكبيرة التي تحققها أنغام على المسرح، كشف المايسترو هاني فرحات عن جانب آخر من رحلتها الفنية، متحدثًا لأول مرة عن التحديات التي واجهتها في بداياتها، كما استعاد كواليس تعاونهما المستمر، مؤكدًا أنها بالنسبة له "صوت مصر".
هاني فرحات لـ ET بالعربي: أنغام كانت بتتحارب من بعض الموسيقيين
وقال هاني فرحات لـ ET بالعربي: أنغام بالنسبة لي هي النافذة اللي بطلع فيها كل إحساسي وكل مزاجي، وهي ست عظيمة. دايمًا بقول إنها صوت مصر، ومصر عندها أنغام، وعندها شيرين، وعندها مي فاروق، وإحنا في نعمة. موسيقتها حتة من روحي وقلبي، وأنا ألفت معظم السترينجز في أغانيها، وحتى قبل ما أبدأ أؤلف كنت مشارك في أغلب أعمالها. أنغام بالنسبة لي رحلة موسيقية بطلع فيها كل الإيموشنز، بفرح وبعيط وبرقص، وربنا يديمها نعمة علينا".
وأضاف أن حفلات أنغام ليست مجرد حفلات غنائية، بل تجربة فنية متكاملة، قائلًا: هي ما بتعملش حفلة موسيقية، هي بتعمل مسرح، وبتاخد الجمهور في رحلة من أولها لآخرها، وبتفوق منها وإنت في عربيتك أو في بيتك.
وكشف هاني فرحات أيضًا عن كواليس اللحظة التي تصدرت الترند خلال أحد حفلاتهما الأخيرة، بعدما غنت أنغام مقطع "يا ريتك فاهمني"، مؤكدًا أن الأمر جاء بشكل عفوي، وقال: بصيت لها وقلت لها يلا، فقالت لي الله يلا، ومن هنا جت الفكرة. إحنا ما بنقعدش نتفق على الحاجات دي، وأجمل حاجة هي اللي بتطلع بطبيعتها، لأنها بتوصل للقلب على طول.
ولأول مرة، كشف هاني فرحات عن الصعوبات التي واجهتها أنغام في بداياتها، مؤكدًا أنها تعرضت لحرب حتى من بعض الموسيقيين الذين عملوا معها، وقال: أنا شاهد على عصر أنغام، وكانت بتتحارب الحقيقة من بعض الموسيقيين اللي بيشتغلوا معاها، لأنها كانت جاية من خلفية موسيقية وثقافية مختلفة، وكانت فاهمة في كل حاجة، وهم ما كانوش متعودين على ده لكنها فضلت تحارب وتجاهد علشان جمهورها، وتقدم رسالة فنية، وعشان كده أنا شايف إنها في القمة من أول يوم ظهرت فيه.
