بعد تعرضها إلى بعض التعليقات المسيئة على السوشيال ميديا بسبب زيادة وزنها، كشفت أروى جودة عن سبب زيادتها الوزن وردت على كل التعليقات المسيئة.
في البداية شكرت أروى كل من سألوا عنها ويدعوا لها من خلال تسجيل صوتي لـ ET بالعربي، وقالت: "أنا الحمد لله وبأذن الله هبقى كويسة، ده الوقت ابتديت اخد علاج والحمد لله قدر الله وماشاء فعل، وعارفة لعندي أبسط من حاجات كتيرة عند ناس تانية.. ربنا يشفي الجميع يارب".
وتابعت كلامها، "الحاجة الوحيدة لـ عايزة أطلبها من أي حد، حابب يعلق عند شخص مشهور، لازم تفكروا أنتو الكلام لبتكبوه ده ممكن يجرح الشخص ولا لاء، محدش عارف ظروف الناس التانية إيه، ما ينفعش ننتقد الناس أنها تخنت أو خست.. إن كان اختيار شخصي أو شيء مرضي، بالحالتين المفروض تكون شخصية وطالما الواحد صحته كويسة هو يختار شكله يطلع أيه".
ووجهت رسالة إلى المتابعين، قالت فيها "الأهم من ده لو حد عنده تعليق ممكن يلاقي أسلوب ألطف لتوصيل الرسالة من دون إهانة أو شتم أو ينقص من قيمة حد".
كما كشفت أنها تعاني من مرض في الغدة منذ حوالي 3 سنين، وأدى إلى زيادة وزنها 20 كيلو، وروت حكايتها "ماكنتش عارفة ايه السبب بتاعها، وكنت بلعب رياضة وبعمل ريجيم.. وما كنتش بحصل على أي نتيجة، وبالصدفة كنت قاعدة مع أختي وقالتلي ممكن تكون مشكلة غدة.. فعلاً أول ما عملت تحليل، قالي الدكتور أني أعاني من كسل في الغدة.. وهو لمسبب الحالة دي، وانشالله الدوا لباخده يساعد الغدة على استعادة نشاطها".
