بعد قرار الشركة المتحدة للخدمات الإعلامية بوقف التعامل مع المخرج محمد سامي، تم تداول بوست وبشكل مفاجىء من حساب لمها أحمد توجهت فيها برسالة هجومية لم تذكر فيها أي أسماء بشكل مباشر ولكن كل التحليلات توجهت إلى أنها قصدت أحمد السقا و أمير كرارة أبطال مسلسل "نسل الأغراب" .
كتبت مها عبر الفيسبوك: "عوضي على الله دي الجمله اللى دايما بقولها لما اتصدم فاشخاص. الحكايه يا ساده نجمين عملوا مسلسل واتنجمت عليهم بنوته لسه الف باء تمثيل واديتهم على قفاهم وركبت عليهم الى ان اصبحت بطلة المسلسل وبطلة الدعايه للمسلسل وهما راضيين رغم ان طول عمرهم مبيعملوش كده مع اي زميله لهم اقربها انا."
وتابعت: " النجم الاولانى بينى وبينه عيش وملح وزماله رشحت فمسلسل بطولته وكان بيقنعنى بدور ولما وافقت بعتولى دور تانى معرفوش دور متعملوش واحده مبتداءه المفروض انه عارف قيمتى الفنيه وعارف انى اضافه له اتهرب منى وموقفش جنبى وباعنى رغم ان الكل عارف انى زى اخته(ندل) اما التانى كان فبداياته يتمنى يسلم عليا ويقولى يااستاذه نزلت من نفسى وقلتله مش هنشتغل مع بعض ماهى الحوجه مره رد وقالى الدور بينادى صاحبه. طبعا محكلكوش قد ايه ندمت نفسى وعشت اسود ايام حياتى عياط واكتئاب. وقلت ( عوضى عليك يارب) .تمر الايام والاتنين يعلو ويتجمعوا مع بعض فمسلسل واحد( على عينهم طبعا) ويمثلوا وحش قوى تمثيل الكفار وطلعوا كمان مبيقروش اللى بيمثلوه وربنا يركب عليهم بنوته سنه اولى تمثيل وخبره ويتحول المسلسل والدعايه الدراما كامله لصالحها وهما (مخدماتيه للاستاذه) .يمهل ولا يهمل ابدوا من جديد يااوفر تمثيل ياللى مبتقروش ياكمبارس جنب النجمه. نصيحه بلاش تتشطروا على اللى كان بينكم وبينهم عيش وملح بلاش تتشطروا على اساتذتكوا. ( عوضنا على الله ) .يارب متحوجنا لحد حتى ولو كان اققرب الناس لينا".
أمير كرارة علق على بوست للكاتب الصحفي خالد فرج يرد من خلاله على بوست مها أحمد وكتب أمير:" أنا عمري ما شوفتها أصلا والله أنا مجدي وخالد وصلاح كامل ناس محترمة دخلت بيتهم، وجملة الدور بينادي صاحبه دي أكيد معرفش بتتقال إزاي والله، وسبحان الله مع إنها كانت مبسوطة من جملة كتع كسح كسل" وما تكلمتش غير بعد قرار محمد سامي لما نزل.
وأما من طرف السقا فأخذت المبادرة في التعليق على الموضوع شقيقته فاطمة السقا:" الكلام ده موجه ليكي يا أستاذة، بدل ما تفضلي تمسحي ردي كل شوية.. أبهرتيني يا مها بأخلاقك العالية، وبأنك افتكرتى العيش والملح اللى كلتيه فى البيت بتاع الفنان اللى مش عارفة تقولى اسمه بس عرفتى تقولى عليه (ندل) اللى هو أحمد السقا.. بس أنا باقولك قدام الناس، قطع لسان أى حد يقول عليه كده لأنه راجل أكرمك ووقف جنبك أنت ومجدى بدل المرة ألف وأمير كرارة برضو راجل جدع ومحترم للى ما يعرفهوش فى البوست بتاعك ده.. معرفش إيه الفرص اللى كانت عندك اللى كان يتمنى يشتغل معاكى فيها زمان، بس هو أى حد يتمنى يشتغل معاه دلوقتى أكيد.. وكلمة الدور بينادي صاحبه دى بتاعة أفلام.. ما بتتقالش فى الحقيقة.. كفايا دراما وتشويه للناس..
وبعدين هما كممثلين مش مطالبين يقفوا جنبك ولا يجيبولك أدوار على فكرة.. دى رؤية مخرج وناس بتوع كاستنج الحقيقة أنا مش عارفة أنت عايزة إيه.. أنا مش شايفة بعد العشرة الطويلة اللى أنت قولتى عليها غير كمية الحقد والسواد والشماتة اللى كانوا متداريين ورا ابتسامة كدابة، معرفش أنت إزاى كنتى بتدخلى بيوتنا الصراحة وأنت ست وحشة كده نسيت أقولك السب والتطاول ده بيدل على الأصل.. وإحنا بقى ولاد ناس، مع أننا عندنا كلام كتير أوى يتقال".
