حلّت أنغام ضيفةً على إذاعة انرجي في القاهرة وذلك بعد اختيارها نجمة شهر يناير، وتناولت في حديثها الكثير من المواضيع ومنها أزمة فناني المهرجانات ورأيها بفيلم "أصحاب ولا أعز" الذي أثار جدلاً واسعاً في مختلف الدول العربية وخاصة في مصر.
ولفتت أنغام إلى أن فكرة تغيير أسماء فناني المهرجانات هو أمر "سخيف"، وتابعت "لو أنا اسمي عنبة! ايه اللي ضد التقاليد؟ فين المشكلة؟، معتبرةً أن نقابة الموسيقيين محقة في عدم السماح للفنانين بتأدية كلمات غنائية هابطة ولكنها أكدت بأنها ضد المنع.
وقالت "بحترم كل الأذواق، مش بحب فكرة المنع، يعني ايه منع؟ لكن لازم ما يكونش في الأغاني تدني في الكلمات مينفعش كلام الأغنية يجرحني".
وعن علاقتها بأصالة وان كانت مستعدة للصلح معها، قالت: "في فرق بين الغلط وتعمد الإساءة.. لو حد غلط فيا هسامحه لكن اللي حصل كان تعمد إساءة".
وكشفت أنغام عن أنها عاشت مرحلة اكتئاب، وأوضحت "قعدت أربع سنين أتعالج من الاكتئاب لكن بطّلت تماماً أخد أدوية، بقيت كل يوم ببص للنعم اللي عندي وأعدّها".
عن الجدل القائم حول فيلم "أصحاب ولا أعز"، أكدت أنغام أنها شاهدت الفيلم، وقالت: "مش متفهمة الضجة اللي أثيرت حول الفيلم بالأسلوب ده، مش عاجبني اللي حاصل طبعاً بالمرة، لأنه ما بيتقالش رأي، احنا بنهاجم وبنقل أدبنا على الناس، مش واخدين بالنا ان ده اسمه فن ان دي سينما، ان دي شخصيات موجودة والسيناريست جابها من الحياة، ممكن حضرتك مش معترف انها عندكم في البيت أو في عيلتك أو في صحابك، براحتك ما تعترفش، وأنا مش قصدي أقولك اعترف ان عندك كده، بس لازم تعترف على الأقل ان ده موجود في المجتمع".
وتابعت "وبلاش فكرة ان احنا نتكلم ودايماً ندخل الدين ودايماً ندخل التقاليد"، وسألت "هو في ايه في التقاليد ما تغيرش على مدى السنين اللي فاتت؟ حاجات كتير تغيرت، تعلمنا نغيّر حاجات كتير جداً، ثقافتنا غيّرت حاجات كتير جداً، التلفون اللي في ايدك غيّر حاجات كتير جداً، الانترنت من يوم ما دخل العالم غيّر حاجات كتير جداً، فتح الدنيا على بعضها، الدنيا مش هي ولو انت مش شايف كده يعني ان انت مش شايف، الأخلاقيات دي بتاعتك أنت، انت وتربيتك وانت وعيلتك، انت بترتبي ابنك أو بنتك ازاي؟".
كما تحدثت عن أكثر الأغنيات التي نالت إعجابها في الفترة الأخيرة، وقالت: "من الأغاني اللي بحبها في الفترة الأخيرة أغنية "تمثيلية" لمحمود العسيلي.. بحبها وبسمعها كتير، بسمع العسيلي كتير، بحب طريقته ومزيكته".
وأشادت بعزيز الشافعي وقالت عنه "موهوب أوي، شاعر شاطر جداً وملحن، مش كتير اللي زيه"، واعتبرت "قدر يعمل المعادلة الصعبة في "ونفضل نرقص"، أغنية دمها خفيفي ومبهجة وفيها غنا لايق عليا".
