في أول رد رسمي لأنغام على الإتهامات التي طالتها على وسائل التواصل الاجتماعي بأنها تقف وراء الهجوم الكبير على شيرين عبد الوهاب، على خلفية أزمتها في حفل مهرجان موازين بالمغرب، حيث تم اتهامها بأنها تُحرّض على حملات إلكترونية للإساءة لشيرين.
وجاء رد أنغام من خلال مداخلة هاتفية مع لميس الحديدي، عبر برنامج "كلمة أخيرة" حيث قالت أنغام:"أنا فعلا تعبانة وفي المستشفى ومكنتش حابة أعرف حد ومعرفتش حد نهائي، وهي حاجة طارئة حصلت يوم الأربعاء الفات واتنقلت إلى المستشفى، وحقيقي مكنتش حابة أبلغ حتى حد من عيلتي عشان مخصهمش، ومكنتش حابة أستقبل زيارات لأني تعبانة جدا ولا قادرة أشرح ولا قادرة أفهم، عشان أرتاح شوية، وكنت فاهمة داخلة يوم وأخد مسكنات وأخرج، لكن الأمر يتطلب وقت أكبر، والموضوع محتاج استشارات كتيرة واهتمامات".
وأضافت:"وأنا مكنتش حابة أتكلم وأنا مش الشخصية اللي بتحب تطلع تدافع عن نفسها، أو حتى أرد على إشاعات، لأني ده منهجي في الحياة من زمان جدا، في أي حاجة تخصني سواء حياتي الشخصية أو الإشاعات، فكنت بسيب المواضيع دي وبقول ربنا هينصفني. واللي يعرفني كويس جدا هيعرف إني مش بتاعت مشاكل، وفي حالي، ومش بتدّعي الأخلاق العالية أو المثالية، بحب شغلي، وبحب جمهوري، واللي بيحبني واللي مش بيحبني برده بحبه، واللي مالوش فيا عادي جدًا، مش كل الناس هتجتمع على حد واحد".
وتابعت أنغام بنبرة حزينة:"المرة دي الظلم أنا مش قادرة أتحمله، ولا قادرة أتكلم، ولا أسكت. الأمور وصلت لشتيمة وتلقيح من ناس المفروض مسؤولة، والمفروض زمايل. إحنا عارفين مين ورا الحملة، وعارفين أصل الفانز بتوع الفنانة المنافسة، ودول عاملين نفسهم ملتزمين وحرصين، ولكن في مواقع كتبت أسمي، وناس تانية بتبعتلي شتيمة على مواقع السوشيال ميديا وشتيمة عنيفة بتوصل أنها بتتمنالي السوء والشر".
واكملت أنغام وهي تبكي:"أنا على سريري في المستشفى أول ليلة، كنتي حاطة تليفوني جمبي عشان أرد على أولادي، ولقيت ناس بتبعتلي أن شيرين على المسرح وفي مشكلة. أنا مالي؟ اتشتم ليه؟! أنا عايزة أفهم، هي الناس مبقتش عندها ضمير؟ أي علاقتي باللي حصل مع شيرين في الحفلة؟ صدفت إني في المستشفى، ولو مش في المستشفى وكنت في البيت أو بشتغل برضو أنا مالي؟! دي مش أول مرة، أنا اتحملت كتير. طول الوقت تلقيح كلام، حتى منها شخصيًا، ولم أعلق نهائي، وزعلت بيني وبين نفسي وعذرتها كتير، وقافلة الموضوع تمامًا".
وأضافت بغضب واضح:"لكن بنوصل أننا نوجه الجمهور كله حول أن أنغام بتعمل مؤامرة وشر، وأنا مش باتهمها هي، لكن الناس اللي حواليها هي اللي بتعمل كده. ده حرام وظلم وعيب، أنا أكبر من كده وهي كمان أكبر من كده. كفاية اللي عملته بيني وبينها. ولو هي عندها فكرة صغيرة عني وحشة، أنتوا كبرتوها جامد. شجعها، دافع عنها بطريقتك، بس بلاش تظلم غيرك".
واختتمت أنغام رسالتها وهي متأثرة:"ومن النهاردة، أي شخص هيتمادى ويغلط أكتر من كده، هرفع قضايا. فعلًا، رفعت على شخص كتب عني على تويتر "مش هترحمي شيرين بقا يا أنغام" واتحبس. أنا مش هسكت تاني، أنا في حالة نفسية وحشة. كفاية قوي كده، كفاية كده عيب وحرام، والظلم ده كتير. كفاية حقد وكره، وسبوني في حالي. محدش له دعوة بالنوايا بتاعتي، أنا نيتي بتتحاسب عند ربنا، سبوني لربنا"."أنا عايزة الناس اللي بتحبني متحطنيش في مقارنة مع حد، ولا يقلل من حد عشاني، ده غلط. ده مبيكرمنيش، ده بيظلمني. وده طلبي من جمهوري، أنا أدعولي، ولو سمحتوا متحطونيش في موقف إني بزقكم، وده بيظلمني".
