مفاجأة صادمة كشف عنها إدوارد اليوم أمام جمهوره على السوشيال ميديا، أعلن خلالها عن إصابته بشلل مؤقت في المعدة بسبب إستخدامه لأبر التخسيس.
وشارك إدوارد عبر ستوري حسابه الخاص على إنستغرام، تفاصيل تجربته مع حقن التخسيس، موضحاً أنها ساعدته على فقدان حوالي 15 كلغ تحت إشراف طبي.
إدوارد يطمئن الجمهور على صحته: "أنا عملت التحاليل وفيه تحسّن"
وشارك إدوارد اليوم الأحد رسالة عبر ET بالعربي طمأن فيها الجمهور على صحته فقال فيها : "أنا بشكركم جداً اأنا الحمدالله بتحسّن وحالتي بتتحسّن والدكتور قلّي هياخد وقت بين أسبوع و8 أيام، بس الحمدالله أنا بتحسن".
تابع : "وأنا نزّلت البوست عشان الناس ما تاخدش الحقن دي من غير متابعة طبيب جهاز هضمي وطبيب قلب ودكتور تغذية، لازم كل دا مع بعضو لأن الواحد ياخد عشوائي دا غلط، ويا رب الناس كلها تبقى كويّسة وأنا إن شاء الله عملت التحاليل والحمدالله كويسة وفي تحسّن".
إصابة إدوارد بشلل مؤقت في المعدة بسبب حقن التخسيس
إدوارد أوضح أنه لم يكن يعاني من أي مشاكل وكان ملتزماً بالنظام الغذائي، لكنه لم يعد يشعر مؤخراً بالجوع مع آلام شديدة في المعدة، بالإضافة إلى مشكلات في الهضم.
وكتب إدوارد : "كلام مهم جدا، أنا كنت باخد حقن التخسيس تحت إشراف دكتور تغذية ونزلت حوالي 15 كيلو، كنت باخد حقن ... ودي الدكتورة نصحتني بيها، بس مشكلتها بتتاخد كل يوم في المعدة بس ميزتها إننا نقدر نتحكم في الجرعات عشان منتعبش".
تابع : "وصلت الوزن اللي أنا عاوزه ودخلنا في مرحلة التثبيت, والدكتورة طلبت مني أروح لدكتور جهاز هضمي أعمل تحاليل ونطمن بس أنا طنشت وقولتلها أنا هاخد حقن أسبوعية بدل اليومية عشان تعبت من كل يوم حقنة وفي ناس نصحوني بالتروليستك لأنها أسبوعية ومش قوية زيالمونجارو، فضلت أخد التروليستك لمدة 5 أسابيع، كل أسبوع حقنة، وكانت تمام معايا وكانت برضه دكتورة التغذية بتسألني على التحاليل كل فترة وكنت بطنش لإني تمام مش حاسس بحاجة، وكمان لا كنت بتخن ولا بخس وباكل عادي طبعا برضه".
ثم أضاف: "وفضلت مواظب على دايت مع الدكتورة لحد الأسبوع اللي فات فجأة مش جعان خالص وقعدت حوالي 4 أيام مش بدخل حمام ولا قادر أكل ووجع في معدتي جامد، ودكتورة التغذية قالتلي وقف الحقن وروح لدكتور جهاز هضمي فورا وعملت كده روحت لدكتور قالي حصلي شلل مؤقت من الحقن في المعدة وكان مفروض تتابع معايا مع دكتورة التغذية قولتله أنا اللي كنت بطنش عشان كنت تمام، قالي الحقن مش وحشة مفعولها كويس، بس أنا بنصح أقصاها 3 شهور بس تاخذها وتوقف فترة وترجع تاني، بس لازم طبعا برده متابعة مع دكتور تغذية".
واختتم إدوارد رسالته متمنياً الشفاء للجميع، كما شدّد على أهمية المتابعة الطبية عند إستخدام أي علاج فكتب: "من غير ما اطول عليكم أنا بقالي أسبوع بتعالج وعملت كل التحاليل حتى صبغة على الكلى، والحمد لله معنديش غير شوية زيادة في الأملاح زي كل المصريين بطني بتتحسن واحدة واحدة، ولسه المعدة وجعاني، والدكتور قالي من 8 لـ9 أيام ترجع عادي، وإن شاء الله هبقى كويس، أنا حكيت لكم تجربتي عشان بقولكوا إن الحقن مش وحشة وجابت نتيجة هايلة معايا بس لازم مع دكتور التغذية دكتور جهاز هضمي، وكمان دكتور قلب لو أمكن عشان سرعة ضربات القلب، أتمنى أكون قدمت لكم معلومات كويسة عن تجربتي وربنا يشفي أي حد تعبان وأشوفكم دايما كويسين".
يُذكر أن إدوارد ليس الوحيد الذي تحدث عن تفاصيل أزمته الصحية ومعاناته من شلل في المعدة نتيجة حقن التخسيس، فتحدث خالد الصاوي أيضاً عن تعرضه لأزمة صحية مؤكداً أنه كاد يتعرض للموت بسبب حقن التخسيس.
كما كشفت هند عبد الحليم، تفاصيل تعرضها لوعكة صحية خلال الفترة الماضية، والتي دخلت على إثرها إلى إحدى المستشفيات وإصابتها بشلل مؤقت في المعدة بسبب حقن التخسيس.
كذلك فاجأت منى فاروق متابعيها عبر إنستغرام بتعرضها لوعكة صحية ودخولها المستشفى، وكشفت عن إصابتها بشلل في المعدة نتيجة أبر فقدان الوزن.
شاهد تقرير سابق : نور الشيخ توثق معاناتها هي و أختها مع أبر التخسيس
