من خلال رسالة صوتية حصرية عبر ET بالعربي، تحدثت إلهام شاهين للمرة الأولى عن الفيديو الذي انتشر لها مع هالة صدقي وهما تضحكان خلال حديث لبلبة في جلسة تكريم المخرج الراحل يوسف شاهين ضمن فعاليات مهرجان الجونة السينمائي، والذي أثار جدلاً واسعاً عبر مواقع التواصل.
إلهام شاهين :"الموضوع كان هزار بين أصحاب"
إلهام أوضحت حقيقة الموقف قائلة: "الحوار اللي كان بيني وبينها لا هو أنا مش مفروض أقول إحنا كنا بنقول إيه، بس الحقيقة إن أنا بقول لها أنا هموت عايزة أروح التواليت، فقالت لي بعيد خلاص قربنا نخلص الندوة، فهزرت وقالتلي اعمليها مكانك وخلاص فضحكنا."
وأضافت: "أنا شاورت ليسرا إنه يلا خلصوا الندوة عايزة أروح الحمام، فهي هزار بين اتنين أصحاب، نونيا مالهاش دخل بيها تماماً."
"نونيا حبيبتي وصاحبتي وعِشرة عمر"
إلهام حرصت على توضيح علاقتها بلبلبة، مؤكدة أنها لا علاقة لها بالحديث الذي دار بينها وبين هالة صدقي: "نونيا حبيبتي وصاحبتي، وإحنا عشرة عمر مع بعض، وهي عارفة هي إيه بالنسبالي، صديقة غالية جداً والمسألة ما تخصهاش أبداً."
"الناس بيتنمروا علينا طول الوقت"
وتابعت شاهين متحدثة عن الجدل الذي تبع المقطع المنتشر قائلة: "حاجة غريبة جداً إن الناس ليه متصورين كده! هم بيتنمروا علينا طول الوقت فمتخيلين إننا بنتنمر على بعض، بالعكس إحنا الفنانين متماسكين جداً واصحاب قوي، وما فيش حاجة هتوقع بينا."
وختمت حديثها بنبرة حازمة: "اللي بيتصيدوا لنا دايماً على مبدأ: حبيبك يبلع لك الزلط وعدوك يتمنى لك الغلط... واضح إن إحنا أعداؤهم مش عارفة ليه، عايزين يخلقوا لنا غلط مش لاقيين غلط فبيخلقوا غلط."
