جدل وضجة كبيرة أثارتها إلهام شاهين على مواقع التواصل الإجتماعي بعد إعلانها عن مبادرة بقيادتها حول موضوع التبرع بالأعضاء بعد الوفاة.
وفي تصريحات لها لـ"ETبالعربي" أكدت إلهام شاهين أن" فكرة التبرع بالأعضاء مهمة جدًا ، وهي مسألة إنسانية ومليئة بالخير وفيها مساهمة لتخفيف الآلام : " الواحد بعد ما يموت جسمه هياكله الدود وهيبقي في التراب فالأولى ان اى عضو سليم في هذا الجسم يروح لمساعدة إنسان محتاج لده مش هقول نطول في عمره علشان العمر ده مكتوب لكن على الأقل هيعيش بلا ألم ولا أدوية زى الناس اللي عندها فشل كلوي بتغسل كل يوم الكلى وعذاب ووقت كتير وتعب".
وأضافت إلهام: "التبرع مساعدة لناس كتير يعني لو حد أعضائه كلها سليمة هيقدر يساعد كام حد عنده 2 كلى وعنده كبد وعنده القلب وعنده قرنية العين وكل جزء حتى الرئة يمكن الإستعانة بيها وكل جزء ممكن يساعد إنسان وهي مسألة إنسانية عظيمة وبتصور أنها تبقى صدقة جارية ومعناه أننا حاسين ببعض وقلبنا على بعض وأحنا مش خسرانين حاجة علشان الجسم هيفنى وهينتهي وأتمنى أن الثقافة والوعى يبقي عند الناس كلها".
