بعد معاناة لـ مدة 160 يوماً، أعلن أحمد ثروت ابن محمد ثروت، عن بداية تعافيه من إصابته بما يسمى متلازمة "ميلر فيشر"، التي جعلته غير قادر على الوقوف.
أحمد شارك فيديو مؤثر على إنستقرام، تضمن اللحظات الأولى التي استطاع فيها الوقوف على قدميه ومحاولة المشي، بعدها عاد للجلوس وبدأ يبكي من شدة الفرح.
وفي التعليق المرفق بالفيديو، كتب أحمد رسالة مطولة، شكر فيها كل الذين وقفوا بجانبه، وتكلم عن الدروس التي حصل عليها من إصابته والفترة العصيبة التي مر بها، وقال: "الحمد لله كرم من ربنا و بفضل دعواتكم انهاردة بعد ١٦٠ يوم صراع مع متلازمة ميلر فيشر، اول يوم انجح اني اقف تاني على رجلي بعد عشرات الاسابيع ومئات المحاولات".
وأضاف، "اتعلمت كتير من اختبار ربنا ليا، اتعلمت الرضا والحمد على كل حال، وان ستر ربنا علينا فوق كل شيء، ومدى تحملك بيجي معاه كرمه ليك فالاخر، وانه مش هيخذلك طول ما انت مسلّم امرك، وان عادي ممكن ابتدي تاني كل حاجة من الاول، وان لسه في امل طول ما في حياة".
وتابع حديثه، قائلاً: "ربنا الهمني في اول الاصابة اني اوثق الاختبار دة من اول يوم حتى الان، ودة عشان اول ما اقوم ان شاء الله اتمنى اكون سبب في التوعيه لمثل هذه الامراض النادرة، وازاي لو لا قدر الله اتصبت انت بيها او حد قريب منك تتعامل معاه ازاي، لأن جزء كبير من التعافي هو الحالة النفسية للمصاب".
وتابع، "حابب اقول حاجة من قلبي بجد، الكرم الي ربنا كرمني بيه دا نوّر لي حاجات كتيرة، خلاني اقعد مع نفسي اقيّمها، وعرفني قيمة نعمة نعمة هو مديهالي، زي اني ادخل الحمام لوحدي، او اعرف اكل لوحدي، او امشي خطوة، او حتى اتحكم فى جسمي، والي معظم الناس ماتعرفوش اني كنت فقدت بصري لاسابيع في عيني اليسرى، وفقدت القدرة على التحكم فالكلام لاكثر من شهر…".
وفي الختام، "اخيراً حابب اشكر كل واحد دعالي من قلبه، وكل صحابي واهلي الي كان حبهم ليا من اسباب اني اقف تاني على رجلي بعد ستر و توفيق ربنا، ودعواتكم ليا لإتمام الشفاء على خير ، ويارب يكون ربنا جعل مني بعد اختباره ده انسان افضل".
فيديو أحمد كان بمثابة بشرى سارة لمتابعيه، وكتبوا الكثير من التعليقات التي حملت رسائل الحب والدعوات بالشفاء الكامل لـ أحمد ثروت.
