لا يزال الوسط الفني اللبناني متأثر بالفاجعة التي حلّت عليه بعد وفاة فادي إبراهيم صباح اليوم، حيث شارك كل من عمار شلق وورد الخال وداليدا خليل وكارمن لبس ونيكول سابا وتقلا شمعون بوداع صديقهم الراحل عن عمر ناهز الـ67 عاماً.
شاهد تقرير سابق : ET بالعربي يتابع مضاعفات الحالة الصحية لفادي إبراهيم
نجوم لبنان يودّعون فادي إبراهيم برسائل مؤثرة عبر ET بالعربي
وشارك اليوم عمار شلق بوداع فادي من خلال رسالة صوتية عبر ET بالعربي، حيث بدا عليه التأثر واضحاً من صوته ليقول :"شو بده الواحد يحكي عن فادي إبراهيم ويوفيه حقّو، ما بينوفى حقّو أبداً، هيدا زلمة كان مليان بالحب لكل العالم، بيوزّع حبّ كيف ما راح وكيف ما إجى، يمكن بلّش الحب يفضى من بلدنا".
كما شاركت كارمن لبس بوداع زميلها في مسلسل 2020 وقالت : "شو بدو يحكي الواحد عن فادي، راح بكّير، كان بيقدر بعد يعطي أكتر بكتير، بيعطي فرح كتير حواليه، صعب كتير الواحد يلاقي كلمات يختصر فيها فادي إبراهيم بكام كلمة، رحيلو كتير صعب ورح نشتقلو والدراما رح تشتقلو".
أيضاً شاركت ورد الخال بوداع زميلها في مسلسل "الموت القادم إلى الشرق"، وكشفت أن لفادي الفضل بدخولها الى مجال التمثيل، لتقول: "فادي إبراهيم كان صديق العيلة، مش مصدقة، اليوم راح خيط من نجومية كل فنان لبناني كان يحبّو واشتغل معو، هو بعدو نابض بالحياة، وصعب الواحد يتقبل فكرة عدم وجودو بيناتنا".
وشاركت أيضاً داليدا خليل بوداع نجم "العاصفة تحب مرتين" فقالت : "خسارة كبيرة عم يعيشها اليوم لبنان والوطن العربي لفقدان النجم فادي إبراهيم، النجم لي كلنا بنحبه، الجانتلمان الراقي المُحبّ المِعطاء، لي عوّدنا على أحلى مسلسلات اله، رح يضل خالد بالذاكرة، الله يرحمو ويصبر محبّينوا وكل أهلوا".
نيكول سابا شاركت أيضاً بإرسال تحية لروح فادي عبر رسالة صوتية فقالت : "دونجوان الدراما اللبنانية الله يرحمه كان صديق مقرب جداً من العيلة، كان صديق أختي، وياما كان موجود بيناتنا بالثمانينات، أنا بعتبر إني خسرت صديق عزيز على قلبي، ولبنان خسر نجم ما بيتكرر وما بيجي متلو، أصيل ومُحب للحياة، رغم كل ألمو كانت البسمة والضحكة ما بتفارق وجّو، كانت كل الناس بتحبو وبتشيد بنفسيتو وبحبّو للآخرين".
وشاركت تقلا شمعون بوداع صديقها فادي بتأثر شديد وكلمات من القلب وقالت : "بكّرت كتير يا فادي، نحنا كنا بعدنا بحاجة إلك، بحاجة لفنان من مستواك ومن مزاياك يكون موجود على الساحة الفنية اللبنانية والعربية، إنت مدرسة وأنا تعلمت منك أشياء كتيرة، وأكتر شي بحب إذكروا هو المزايا الحلوة يلي إنت بتتمتّع فيها كإنسان وكفنان، على قد ما كان وجودك حلو، على قد ما غيابك مرّ".
