لقاء طال انتظاره وحلقة انتظرها جمهور جورج وسوف متشوقين لمشاهدته مع إسعاد يونس في برنامج صاحبة السعادة، تصدر اللقاء وتصريحات جورج وسوف العناوين وحديث الجمهور على السوشيال ميديا منذ عرضها مساء أمس الإثنين على شاشة dmc.
مواقف عفوية أظهرت خفة دم جورج وسوف خلال اللقاء، وأثناء الحلقة حدثت خناقة كوميدية بين جورج إسعاد يونس بسبب مصورة في الاستوديو؛ حيث قال لـ إسعاد يونس "أنا بتكلم على حقوق المرأة ليه بتقولي أنا كاميرا مان وهي سيدة، يبقى اسمها كاميرا وومان أنا بتخانق مع المنطق الغلط".
أطلق جورج وسوف عدة تصريحات عن طفولته وحياته الشخصية وابنته عيون التي حضرت برفقته لإحدى حفلاته، فقال: "عيون بنتي حبيبتي، أول مرة تحضر، وكانت حفلة وخلاص، وكانت حالة خاصة جدًا، وعيون وجورج أكتر اتنين شبهي".
وأضاف متحدثا عن طفولته: "كنت وأنا صغير، ليا فيلم وثائقي، ووالدي كان بيناديني بيقولي أبو علي، عشان (علي) جدع وبيساعد أبوه، واخواتي ملتزمين وبيحضروا حفلات قليلة ليا، وكل شهر شهرين بروح أقعد معاهم، وأخواتي البنات متسجلين معايا في نفس اليوم، عشان في أيام الوالد والوالدة كان بيسجلوا الاتنين سوا، أختي أكبر مني بسنة، وأختي الصغيرة أصغر مني بسنة، وكنت شقي، وكنت دايمًا مع ربنا، وبخاف من الحاجات اللي فيها الأذية، ومكنتش مدلل، وابتديت حياتي من وأنا صغير بدلع في الناس وبغني للناس، الحمد لله ربنا مديني كل حاجة".
وتابع جورج وسوف: "أنا بغنى للعاشق والغلبان واللى فاقد حبيبه واللى ابنه مسافر، وبغنى لكل الناس وبغنى بإحساس كأني مكانه".
وطمأن جمهوره على صحته قائلاً: "أنا الحمد لله كويس و بقضى يومى زى كل يوم، بتفرج على التليفزيون وبأطّلع على أخبار العالم".
وعن اتجاهات الغناء هذه الأيام قال جورج وسوف: "اتجاهات الغناء في علم الله، وأنا مش ضد أغانى الشباب الجديدة وأنا مع كل حاجة جديدة، وبحاول أعاصر الشباب وأغنى لهم كمان، لأن لو معاصرناش الجيل ده تبقى مصيبة".
رد جورج وسوف، على من يريده اعتزال الغناء، مشيرًا إلى أن الغناء أهم شيء في حياته مؤكدًا: "مش هعتزل، وكل اللي بيقول اعتزل اقول لهم اني مستمر في الغناء، وهذا الأمر له سبب لان الغناء حياتي، معنى الاعتزال أروح أموت، وطول ما انا عايش هغني".
طالب جورج وسوف من القائمين على حفله المقرر إقامته يوم 29 أكتوبر الجاري بالإسكندرية، طرح فئة جديدة من التذاكر المخفضة بقيمة تصل إلى 300 جنيه مصري لحضور جميع الفئات من محبي غنائه.
