منذ عرض البرومو الأول لمسلسل لوبي الغرام، بدأت المقارنات مع صالون زهرة، خاصة أن العملين يحملان توقيع المخرج جو بو عيد. فهل نحن أمام تكرار للروح نفسها؟ أم أن التشابه ظاهري فقط؟ في حديثه مع ET بالعربي، سألت ندى عقيقي جو عن ردّه على هذا الجدل، فجاء جو واضحاً وصريحاً.
جو بو عيد مخرج عملي صالون زهرة و لوبي الغرام يرد على جدل تشابه العملين عبر ET بالعربي
"ما بعتبر إنه بيشبه صالون زهرة"
جو بو عيد قال: "أنا ما بعتبر يعني إنه بيشبه صالون زهرة. يمكن الـgenre مثل ما قلتي رومانتيك كوميدي، يمكن نحن متعاطين مع هالمشروع بنضج، لأنه لما إجا صالون زهرة من ثلاث أربع سنين ما كان في مشاريع كثير بتشبهه، وحمد الله عمل ضجة والعالم حبّته بالوطن العربي وبمصر. فهلأ إذا إجا مشروع تاني عم يحكي بذات الـgenre مش يعني بيشبه صالون زهرة."
وأضاف: "أنا حبي وتعلقي بصالون زهرة كثير كبير، وحبي وتعلقي بلوبي الغرام بعد يمكن أكثر وأكثر، ما بعرف أيه أغلى علي. بس أنا بأكد إنه بالنسبة إلي ما في تشابه مباشر."
"إذا في إحساس فني قريب.. هيدا شيء منيح"
وعن الإحساس الفني الذي شعر به البعض، أوضح جو: "إذا في إحساس فني قريب أنا بالنسبة إلي هيدا شيء منيح، لأنه عم نشبه عمل لعمل already ناجح وحبوه العالم. إذا حبّوا العالم لوبي الغرام مثل ما حبّوا صالون زهرة أنا بكون جداً راضي وبنكون كلنا كثير مبسوطين. فهيدي ما فيها انتقاص من أي شيء عم نعمله هلأ بلوبي الغرام."
"نزلت صورة من عند باميلا الكيك وصاروا يعملوا مقارنات"
جو كشف أيضاً أن المقارنات بدأت حتى قبل مشاهدة العمل: "لنكون صريحين، في ناس قبل ما يشوفوا الـtrailer نزلت صورة من عند باميلا الكيك يلي هي منها صورة رسمية بالمشروع وصاروا يعملوا مقارنات. بس هيدي مقارنات مش موجودة، لأنه الشخصيات مختلفة والقصص مختلفة."
وختم: "أنا مطمّن بالي وبتخيل العالم بإذن الله رح يستمتعوا كثير، وفي أشياء كثير يكتشفوها بلوبي الغرام مختلفة عن إنه بس نعمل مقارنات."
تكرار الأسماء.. خيار مقصود
ندى أشارت أيضاً إلى أن وجود بعض الممثلين أنفسهم، مثل مجدي مشموشي، قد يكون سبباً في إحساس الجمهور بالتشابه. فردّ جو:"أنا لما اشتغل مع ممثل وحبه، إيه بحب أرجع شوفه بأعمال ثانية. كل مخرج بيكون عنده صورة معينة أو باقة من الناس اللي بحب يشتغل معهم ويطلع منهم كل مرة شيء، أو بيكون شايف زوايا معينة منهم."
وعند سؤاله إن كان يطلبهم بالاسم، قال: "أنا بطلب، إيه في ناس بطالب فيهم. مثلاً مجدي، الكاركتر كان لشخص أصغر بالعمر وغير بروفايل، بس أنا حسيت إنه لا، مجدي مشموشي بيقدر يلعب كرم بهالطريقة. الشخصيات الباقية أكيد شاركنا أنا والشركة لننقيهم."
بين نضج التجربة وتكرار التعاون، يراهن جو بو عيد على أن لوبي الغرام سيُثبت اختلافه على الشاشة، بعيداً عن المقارنات المبكرة.
