بعد سلسلة من الأزمات والجدل الذي مازال مستمر، يبدو أن حسام حبيب قرر أن يعود ويرد على جميع الاتهامات التي وُجّهت إليه، وذلك خلال لقائه مع بسمة وهبة في برنامج العرافة. وتحدث حسام بشكل مباشر عن تفاصيل خلافاته مع شيرين عبد الوهاب، موضحًا أسباب الأزمة بينهما التي أثارت جدلًا واسعًا. وأكد أنه اختار الحديث هذه المرة لحماية صورته وصورة عائلته من الانتقادات التي تعرض لها بسبب تصريحاتها السابقة.
علاقته بشيرين عبد الوهاب قبل الزواج
بدأ حسام حديثه موضحًا علاقته بشيرين قبل الزواج، قائلاً:"أنا وشيرين كنا أصدقاء قبل جوازنا لمدة طويلة، وعمرنا ما حصلت بينا أي مشاكل، في بداية زواجنا، كان زواجًا جميلًا، والناس كانت واخدة عنه صورة حلوة، جوازنا استمر 7 سنوات، وكنت أتمنى أنه يفضل كده، لكن المرحلة دي عدت، والناس مستكترين إنها تعدي عليا".
وعن قراره بالرد الآن، قال حسام حبيب:"هي مرحلة وعدت، لكن الناس مستكترين أنها تعدي عليا، أنا مكنتش بتكلم مش عشان ضعيف أو قليل الحيلة أو معنديش رد، لكن حفاظًا على العِشرة والأيام اللي عيشناها مع بعض، دي عندي بالدنيا، وكنت مصمم لآخر نفس أحافظ عليها، لكن الناس مش عايزاني أعدي، أسكت يقولوا معندوش حاجة يقولها، أضحك يقولوا مستفز، أقول نحكم ربنا يقولوا أنت جاي تتكلم بالدين، طب إيه المطلوب مني؟ أنا مكسِبتش حاجة من القصة دي غير الأذى وعلاقتى بشيرين دمرتنى ودمرت أهلى وكل اللى حواليا".
وردًا على اتهامه بحلق شعر شيرين، قال :"الدكتور اللي كان بينظم علاقتنا قال لي لما تلاقيها متعصبة ومتنرفزة قوم وروح مكان تاني، وفي مرة طلبت مني أسمعها الأغاني بتاعتي، ولما سمعتها، عيطت وقالت لي: أنت بتعمل أغاني لنفسك أحلى من اللي بتعملها لي، قلت لها: أنت اللي قلتي لي ملكش دعوة بشغلي، وعلى العموم لو عجبوكي خديهم، ومن هنا بدأت تتعصب، فسبتها ودخلت أوضة تانية وطلبت سندوتش وأكلته ونمت".
فوجئت تاني يوم أنها مش موجودة في البيت، ولمدة 3 أيام أنا مش عارف هي فين، لحد ما كلمتني وقالت لي تعال، روحت أنا وصديقتنا وصديق لينا على الأوتيل اللي كانت فيه، وتعاملنا عادي، مفيش حاجة، صديقتي كانت بتقول لي إن صديقى اللي كان ماسك أعمالها بيكرهني وبيسخنها عليا ويقول لها اطلقي منه ومتخليش ليه علاقة بشغلك، شيرين جت وقطعت الكلام، و قالت لي: "أنت جاي تنكد علينا؟ طلقني لو كنت راجل"، وشتمتني قدام صحابنا، الموضوع كبر، فقلت لها: "هطلقك، البسي وتعالي هطلقك"، وسبتني ودخلت الحمام قولت هي بتلبس، فوجئت إنها حلقت شعرها".
رسالة حسام حبيب لشيرين عبد الوهاب
كما وجه حسام حبيب رسالة لشيرين خلال الحلقة، قائلاً:"كل مشكلة حصلت كان فيها شهود وأدلة، ردي على كلامي وليكي حق الرد، وأنا بسألها ده حصل إزاي؟ وإمتى؟ وليه؟ وفين؟ وردي بإثبات، لأني معايا إثباتات لكل مشكلة وهَدَافِع عن نفسي".
معاناة حسام حبيب النفسية
كشف حسام حبيب عن معاناته النفسية بسبب علاقته مع شيرين، قائلاً:"شيرين جابتلي المرض لما بقرأ عن أعراض اضطراب الشخصية الحدية (Borderline Personality Disorder) بحس إني بقرأ عن نفسي، لما بروح للدكتورة وتقول لي عندك إيه من دول، بقولها كل الأعراض وعليهم 2 زيادة".
وأضاف:"كنت بسألها كل يوم ليه أنا؟ وكانت بتقول لي عشان بحبك وإنت الوحيد اللي تستحملني، قلت لها أنا هاخد الجزء الحلو منه بس، لكن هل ده مبرر؟".
إمكانية رجوع حسام حبيب وشيرين
أما عن إمكانية عودته لشيرين عبد الوهاب، قال حسام:"المرحلة دي خلاص عدت، ورحلتي مع شيرين انتهت ولا يمكن أرجع لها أبدًا. أنا مكسِبتش حاجة من القصة دي غير الأذى".
