يبدو أن الجدل الذي حصل على صورة ياسمين أبوالنجا ابنة نجلاء فتحي وزوجها محمد خضر، حيث كان يحمل لها الحذاء على السجادة الحمراء في مهرحان الجونة، إضطرته إلى الرد خاصةً بعد التعليقات التي إنقسمت بين إيجابية وسلبية، والساخرة أيضاً.
ومن خلال صفحته الشخصية على الفيسبوك، كتب محمد خضر "الصورة ديه اتاخدت واحنا مروحين الساعة ١:٣٠ صباحاً من حفل الافتتاح، مش وإحنا داخلين حفل الافتتاح اكيد مش هدخل حفلة شايل جزمة مراتي وماشي!"، وأضاف "إحنا الدعوات بتاعتنا دعوات VIP مش دعوات مشاهير، فا ده اصلاً ما بيدخلناش على السجادة الحمراء مع الفنانين، ده بيدخلنا من باب تاني جنبه ما فيهوش كاميرات كل ما هناك ان بعد ٦ ساعات من الحفل، واحنا خارجين باب الخروج كان زحمة وكل الناس خارجه منه (فنانين وغير فنانين ومصورين وكاميرات فيديو).. ومراتي اكيد بعد ٦ ساعات رجلها تعبت زي اي واحدة رجلها بتتعب في اي فرح.. فا قلعت الجزمة! فا من الطبيعي ومن الرجولة ومن الأدب ان انا اللي انزل اجيب الجزمة (مش هخلي مراتي توطي وسط الناس اكيد.. ) وديه لا حاجة تعييني ولا تقلل مني.. واحدة شايلة بيتي على راسها ١٥ سنة، مش هاشيل جزمتها ١٥ دقيقة؟".
وتابع محمد خضر تعليقاً على الموضوع، "المهم ضربت بعيني لقيت ممر السجادة الحمرا مفتوح وفاضي قولت لها ياللا نخرج من هنا اسرع، ولقينا المصور العزيز محمد حامد بيطلب مننا صورة فا وقفنا ٣ ثواني بالظبط.. ابتسمنا واخدنا الصورة وخلعنا.. والراجل تفضل مشكوراً وبعت لي الصورة على الفيسبوك وبصراحة الصورة لذيذة.. ولما حطيتها عندي على الوول لقيتها بيتعمل لها شير روحت قافلها (للاصدقاء فقط) بس كدة".
تابعوا في ETبالعربي: الجونة يعيد التنمر على النجمات🔻
