كيف خسرت شيرين عبد الوهاب وزنها؟ سؤال شغل جمهورها خلال الفترة الماضية، خاصة بعد ظهورها بإطلالة لافتة في حفلها بموازين في المغرب في يونيو 2025، لتتواصل بعدها رحلة التغيير التي ظهرت نتائجها بشكل واضح في أحدث حفلاتها بالساحل الشمالي.
وفي حديث خاص مع ET بالعربي، كشف د. محمود العفيفي، المتابع لنظام شيرين الغذائي، تفاصيل الرحلة التي بدأت بترشيح من الفنان أحمد سعد.
وقال د. محمود العفيفي: "أحمد سعد المطرب الكبير هو اللي رشحني ليها، كان مديها feedback حلو، لأنه كان صحاب أحمد أصلاً خَسّوا معايا، فيه اللي خَسّ 20 و50 كيلو، فكان مديها ثقة كبيرة فيا وقال لها: خلي بالك ده شاطر".
وأضاف أن شيرين كانت لديها رغبة واضحة في خسارة الوزن بطريقة طبيعية، بعيداً عن فكرة الجراحة، قائلاً: "كانت عايزة تعمل دايت وتخس وحابة إنها تعمل حاجة طبيعية، مش حابة خالص قصة الجراحة".
د. محمود العفيفي يكشف بداية رحلة شيرين لخسارة الوزن
بدأت شيرين عبد الوهاب رحلة خسارة الوزن بإصرار كبير، وفقاً لما كشفه طبيبها، الذي أوضح أنه لاحظ فرقاً واضحاً منذ الأسابيع الأولى.
وقال: "رحت قابلتها وكان عندها إصرار قوي إنها تخس وبدأنا مع بعض، والحمد لله كان فيه feedback قوي بجد. فاكر أول مقابلة قابلتها غير المقابلة رقم 4، قابلتها 4 مرات مع بعض كل شهر أو 3 أسابيع، لقيت فرق كبير جداً".
وتابع: "من أول أسبوع كان فيه نتيجة، وطبعاً ده اللي خلاها تشجعت وكملت معايا بفضل ربنا".
ما هو نظام شيرين الغذائي؟
وعن النظام الغذائي الذي اتبعته شيرين، كشف د. محمود أن الرحلة اعتمدت على هدف محدد يمتد لـ100 يوم، مع التركيز على الأطعمة الخفيفة والطبيعية التي تفضلها.
وأوضح: "إحنا بنحدد target الـ100 يوم، وده اللي دخلنا فيه شيرين. إحنا مركزين قوي على الحاجات اللي هي الخفيفة اللي تحبها، تحب تاكل زبادي، تحب تاكل بروتين، حاجات خضار خفيف، كلها حاجات طبيعية خالص".
ولم تقتصر رحلة شيرين على النظام الغذائي فقط، إذ أشار د. محمود إلى أن المشي كان جزءاً أساسياً من الخطة، قائلاً: "المشي بس، أنا دايماً مع أي حد بنصحه برياضة المشي مع النظام الغذائي".
شيرين عبد الوهاب: "الحقني مش قادرة خالص"
ورغم النتائج التي بدأت تظهر سريعاً، لم تكن رحلة خسارة الوزن سهلة دائماً، إذ كشف د. محمود عن رسالة صوتية أرسلتها له شيرين خلال الرحلة، قائلة: "الحقني مش قادرة خالص، أنا دايخة وهبطانة، إديني أي vitamins مش قادرة".
لكن شيرين واصلت التزامها بهدفها، وهو ما اعتبره د. محمود من أهم أسباب نجاح الرحلة حتى الآن.
وأكد أن هدفها لم يكن مجرد رقم على الميزان، قائلاً: "عندها أكثر من الميزان، أكثر ما هي حابة توصل للشكل بتاعها قبل كده، المتناسق، الجميل، اللي هي بتحب تظهر فيه قدام الناس كلها، الحاجة اللي بتليق باسم شيرين وباسم فنانة megastar، الحاجة اللي كانت قبل كده عليها".
كم كيلو خسرت شيرين عبد الوهاب؟
ورداً على سؤال ET بالعربي حول عدد الكيلوجرامات التي خسرتها شيرين حتى الآن، أوضح د. محمود أن الرقم لم يكن محور اهتمامهما، قائلاً: "والله ما وزناش، على فكرة، كنا مهتمين بالشكل أكثر".
وأضاف: "إحنا عملنا جزء من المشوار ولسه هنكمل فيه، بس الحمد لله الجزء اللي أنا شفته والنتيجة اللي إحنا وصلنالها، أنا بالنسبة لي نتيجة مرضية بشكل كبير جداً جداً".
وتابع مشيداً بإصرار شيرين: "سايبة نفسها خالص، ما كنتش بتقلل أي حاجة أو حتى كانت بتعترض، بس هي عندها إرادة قوية وهدف إنها تغير من شكلها وتغير من نفسها".
لماذا نشر د. محمود العفيفي صورة شيرين؟
وبعد ظهور النتائج، نشر د. محمود العفيفي صورة جمعته بشيرين عبر حسابه على إنستغرام، معبراً عن سعادته بما حققته حتى الآن، رغم أنه كان يعتبر رحلة خسارة الوزن أمراً خاصاً.
وقال: "أنا بصراحة ما كنتش هنزل الصورة أصلاً، يعني الموضوع كنت حاسه private، بس كمية الناس اللي بعتولي وقالولي ألف مبروك، وكان فيه كتير عارفين إني أنا بتابع مع مدام شيرين في الدايت بتاعها، فقالولي إزاي وألف مبروك وإحنا فرحانين لك".
واختتم حديثه قائلاً: "الناس كانت فرحانة أكثر من ما أنا فرحان بصراحة".
