مع تطبيق قرار الإغلاق المبكر لدور السينما والمولات عند الساعة 9 مساءً في مصر ضمن خطة ترشيد استهلاك الطاقة، انعكس القرار مباشرة على حركة السينمات، خاصة أن العروض المسائية تُعد الأكثر جذبًا للجمهور. وفي هذا السياق، استطلع "ET بالعربي" آراء صناع السينما حول تأثير القرار على القطاع.
هشام عبد الخالق
وأوضح هشام عبد الخالق، رئيس غرفة صناعة السينما، أن دور العرض تأثرت سلبًا بقرار الإغلاق المبكر ضمن إجراءات الدولة لترشيد استهلاك الكهرباء، مشيرًا إلى أن ذلك أدى إلى تراجع ملحوظ في إيرادات السينما، وقال: "أنا مع قرار الدولة لأنها أكيد شايفة حاجات إحنا مش شايفنها ولازم ندعم القرار، لأنه بيرشد حاجة معينة، بس ليه منحاولش نقفل السينمات الصبح اللي مبتشغلش فيه ونفتح للحفلات المسائية، وبالليل هو نفس استهلاك الصبح". وأضاف: "احنا بنشتغل الصبح عشان لازم نفتح مع المول، لكن أنا لو ممكن بقرار من سيادة رئيس الوزراء بأني أفتح حفلات بليل بس اللي هي 6 و9 و12 بدل حفلات بتاعت 10 و1 و3 الصبح، هتقولي اي الفرق؟ هقولك مفيش أي فرق، نفس استهلاك حفلات الصبح هي هي حفلات بليل".
وتابع: "أصحاب الأفلام بيحجبوا عن طرح أفلامهم، بيوقفوا عن طرح أفلام، لأنه برده هو عايز الحفلات كاملة، والمساحة كاملة، وبيخاف على الإيرادات، فعدم طرحه الأفلام بيخلي يحجب الفيلم عن التوزيع الخارجي، فوقف المنتج مش عارف يطرح الفيلم في مصر ولا خارج مصر، وكمان بيأجل طرح الفيلم في المنصات، فهو حط فلوسه كلها في الإنتاج ووقفت. أنا كان عندي تلت أفلام هينزلوا يوم 8 أبريل، التلت أفلام دول بعد القرار مش هتنزل، طب لما التلت أفلام دول يتأجلوا، هينزلوا إمتى؟ فجايز نوعية الفيلم والكاست، كان مختار الميعاد ده لطيف وفي شم النسيم وكل الحاجات الحلوة دي، ومش هينزل عيد الكبير عشان عارف أني في أفلام طويلة، بعد العيد في مدارس، وده كمان هيأثر على الأفلام اللي داخلة واللي تصور كان في أفلام هتبدأ تصور في شهر أبريل، فخاف".
من جهته، قال جمال العدل: "إن قلة عدد الحفلات الليلية والأوقات المحدودة للعرض قللت من قدرة الجمهور على متابعة الأفلام، وهو ما انعكس بشكل مباشر على العائدات، الايرادات قلت بشكل مخيف تخلي الناس تخاف تنتج تاني".
وأضاف الموزع السينمائي محمود الدفراوي: "هي الفكرة أني أنا بخفف احمال، أنا المفروض اشتغل من 10 الصبح لـ 9 بليل يعني 11 ساعة على مدار اليوم، الاقتراح اللي بقوله إننا ناخد الـ11 ساعة دول من الساعة 3 العصر لحد الساعة 2 بليل، نفس الـ11 ساعة، بس عشان اعرف أغطي تكاليف العرض".
إسعاد يونس
كما حذّرت إسعاد يونس، نائب رئيس غرفة صناعة السينما، من تداعيات قرارات الإقفال المبكر للسينمات على صناعة السينما في مصر، مؤكدة أن الحفلات الليلية تمثل العمود الفقري لإيرادات دور العرض. وأوضحت: "حفلات 9 و12 مساءً هي الأهم والأعلى إيرادًا، وهي التي تعتمد عليها السينمات لتغطية باقي أيام الأسبوع"، مشيرة إلى أن استهلاك الطاقة لا يختلف بين الحفلات الصباحية والمسائية، لكن الفارق الحقيقي يكمن في عدد الحضور، حيث يشكل جمهور الليل نحو 80% من إجمالي الرواد.
وأضافت إسعاد يونس أن صناعة دور العرض تمر بالفعل بأزمة، خاصة في ظل ارتفاع التكاليف، لافتة إلى أن استمرار الإقفال قد يفاقم الخسائر بشكل كبير ويؤثر على العمالة المرتبطة بهذا القطاع. واقترحت حلاً عمليًا يتمثل في تقليل الإضاءة الخارجية لدور العرض بدلًا من إلغاء الحفلات الليلية، موضحة أن العروض داخل القاعات تتم في الظلام ولا تستهلك طاقة كبيرة، كما دعت إلى تقليل عدد الحفلات بدلًا من إلغائها بالكامل، بحيث يتم تشغيل 3 حفلات فقط بدلًا من 6، بما يحقق التوازن بين ترشيد الاستهلاك والحفاظ على حركة التشغيل والإيرادات.
